गुहागर : तालुक्यातील रानवी येथील बंद अवस्थेतील निरामय रुग्णालयाची आमदार प्रमोद जठार यांनी मंगळवारी पाहणी केली. लवकरच मुख्यमंत्र्यांच्या हस्ते या निरामय हॉस्पिटलचे उद्घाटन होईल, असे संकेत आ. जठार यांनी यावेळी दिले. मुख्यमंत्र्यांच्या आदेशानुसारच ही पाहणी केल्याचे त्यांनी सांगितले.
विधान परिषदेचे भाजपचे आमदार प्रमोद जठार यांनी मंगळवारी गुहागर तालुक्यातील रानवी येथील बहुचर्चित व बंद अवस्थेत असलेल्या निरामय रुग्णालयाची पाहणी केली. आज येथील जनतेला या रुग्णालयाची नितांत गरज आहे. निरामय पुन्हा सुरू व्हावे, अशी आपणा सर्वांची तसेच आपल्याबरोबर असलेले सर्व भाजपचे पदाधिकारी, माजी आमदार डॉ. विनय नातू यांची इच्छा आहे. यामुळे त्यांच्या स्वप्नांना नक्कीच दिशा मिळेल. मुख्यमंत्री देवेंद्र फडणवीस यांच्या आदेशाने व प्रदेशाध्यक्ष आमदार रवींद्र चव्हाण, आमदार प्रसाद लाड यांनी सांगितल्याप्रमाणे आज आपण या निरामय रुग्णालयाची पाहणी केली आहे.
