Rajapur Accident | मिठगवाणे सागरी महामार्गावर टेम्पो उलटला; महिला मजूर ठार, ७ महिला गंभीर जखमी
Mithgavane coastal highway tempo accident
राजापूर : मिठगवाणे येथील सागरी महामार्गावर बुधवारी (दि.१३) सकाळी सव्वा नऊच्या सुमारास झालेल्या भीषण अपघातात ७ महिला गंभीर जखमी झाल्या. त्यापैकी एका महिलेचा मृत्यू झाला आहे.
याबाबत अधिक माहिती अशी की , आज सकाळी वाघ्रण येथून बागकामासाठी जानशी पठाराकडे महिला मजुरांना घेऊन टेम्पो निघाला होता. यावेळी समोरून येणाऱ्या लक्झरी बसला ओव्हरटेक करत असताना टेम्पो चालकाचा ताबा सुटला. त्यामुळे टेम्पो सुमारे १०० ते १५० फूट रस्त्याच्या कडेला पलटी मारत फरफटत गेला. यात टेम्पोतील सर्व महिला आणि एक छोटी मुलगी गंभीर जखमी झाल्या. तसेच, टेम्पोचालक आणि केबिनमध्ये असलेले इतर पुरुष प्रवासीही जखमी झाले आहेत.
तातडीची मदत आणि उपचार
अपघातानंतर सर्व जखमींना तत्काळ जैतापूर प्राथमिक आरोग्य केंद्रात दाखल करण्यात आले. त्यानंतर अधिक उपचारासाठी त्यांना रत्नागिरी सिव्हिल हॉस्पिटलमध्ये हलविण्यात आले. उपचारादरम्यान एका महिलेचा मृत्यू झाल्याची माहिती मिळाली आहे.
पोलिसांची तात्काळ कारवाई
अपघाताची माहिती मिळताच सागरी पोलीस ठाण्याचे पथक, पोलीस सहाय्यक निरीक्षक प्रमोद वाघ यांच्या मार्गदर्शनाखाली १५-२० मिनिटांत घटनास्थळी दाखल झाले. स्थानिक नागरिकांच्या मदतीने सर्व जखमींना तातडीने रुग्णालयात पोहोचवण्यात आले. पोलिसांकडून या प्रकरणाचा पुढील तपास सुरू आहे. अपघाताची बातमी कळताच परिसरातील नागरिकांनी जैतापूर प्राथमिक आरोग्य केंद्रात धाव घेतली.
