रत्नागिरी : हवामान खात्याने आज रत्नागिरी जिल्ह्याला 'यलो अलर्ट'चा इशारा दिला असतानाच, दक्षिण रत्नागिरीत सकाळपासून दाटून आलेल्या ढगांनी दुपारनंतर जोरदार वृष्टीला सुरुवात केली. विशेषतः लांजा तालुक्याच्या मध्यवर्ती ठिकाणी, बस स्थानक आणि बाजारपेठ परिसरात पावसाने जोरदार हजेरी लावल्याने जनजीवनावर त्याचा परिणाम दिसून आला.
दुपारनंतर पावसाचा जोर अचानक वाढल्याने लांजा शहरात रस्त्यांवरील वाहतूक काहीशी मंदावली. अचानक आलेल्या जोरदार सरींमुळे ग्रामीण भागातून तालुक्याच्या ठिकाणी विविध कामांसाठी आलेल्या नागरिकांची चांगलीच तारांबळ उडाली. अनेकांना आडोसा शोधावा लागला, तर काहींनी छत्र्या, रेनकोटच्या मदतीने आपली कामे सुरू ठेवली.
दुसरीकडे, या पावसाने ग्रामीण भागातील शेतकऱ्यांच्या आशा पल्लवित केल्या आहेत. पेरणीची कामे बऱ्यापैकी पूर्ण झाली असून, आता पिकांना पाण्याची नितांत गरज होती. या समाधानकारक पावसामुळे बळीराजा सुखावला असून, चांगल्या पिकाची अपेक्षा व्यक्त होत आहे. सकाळपासूनच्या ढगाळ वातावरणानंतर आलेल्या या पावसाने उकाड्यापासूनही काहीसा दिलासा दिला आहे.
