रत्नागिरी : जिल्ह्यातील १ ते १९ वर्षे वयोगटातील बालके आणि किशोरवयीन मुला-मुलींचे आरोग्य सुदृढ राहावे, त्यांच्या शारीरिक व बौद्धिक विकासास मदत व्हावी आणि त्यांना कृमी संसर्गापासून संरक्षण मिळावे, यासाठी आरोग्य विभागाच्या वतीने २७ ऑक्टोबर रोजी राष्ट्रीय जंतनाशक दिन राबविण्यात येणार आहे. या मोहिमेंतर्गत रत्नागिरी जिल्ह्यातील १ ते १९ वर्षे वयोगटातील दोन लाख ६३ हजार ४८४ लाभार्थ्यांना जंतनाशक गोळ्या सेवनास देण्यात येणार आहे.
या मोहिमेची प्रभावी अंमलबजावणी करण्यासाठी जिल्हा आरोग्य अधिकारी डॉ. अनिरुद्ध आठल्ये व जिल्हा माता बालसंगोपन अधिकारी डॉ. माधव ठाकूर तसेच सर्व तालुका आरोग्य अधिकारी यांच्या मार्गदर्शनाखाली जिल्ह्यातील सर्व तालुक्यामध्ये जंत विरोधी मोहीम यशस्वी राबविण्याबाबत सर्व वैद्यकीय अधिकारी व पर्यवेक्षक यांचा तालुकास्तरीय आढावा व प्रशिक्षण घेण्यात आले आहे.
सर्व प्राथमिक आरोग्य केंद्र स्तरावर सर्व आरोग्य कर्मचारी, आशा, अंगणवाडी कर्मचारी व शिक्षक -मुख्याध्यापक यांचे प्रशिक्षण घेण्यात आले आहे. तसेच मोहिमेबाबत विविध समाज माध्यमांद्वारे मोठ्या प्रमाणावर जनजागृती केली जात आहे. या मोहिमेत शाळा, महाविद्यालये, अंगणवाडी केंद्रे आणि आरोग्य संस्थांच्या माध्यमातून पात्र लाभार्थ्यांना वयोगटानुसार निर्धारित मार्गदर्शक सूचनांप्रमाणे जंतनाशक गोळ्या देण्यात येणार आहेत.
यामध्ये अंगणवाडी केंद्रातील बालके, शाळामध्ये शिक्षण घेणारे विद्यार्थी, शाळाबाह्य बालके व किशोरवयीन मुला-मुलींचा समावेश आहे. पालकांनी आपल्या पाल्याने जंतनाशक गोळी घेतली आहे, याची खात्री करावी. शिक्षकांनी पात्र लाभार्थ्यांना गोळ्यांचे सेवन करून घेण्यासाठी तसेच मोहिमेची प्रभावी अंमलबजावणी करण्यासाठी आरोग्य विभागास सहकार्य करावे, असे आवाहन करण्‍यात आले आहे.
ही मोहीम यशस्वी होण्यासाठी आरोग्य विभाग, शिक्षण विभाग, महिला बालविकास विभाग यांनी समन्वयाने काम करावे तसेच १ ते १९ वर्षे वयोगटातील सर्व मुला -मुलींनी २७ ऑक्टोबर रोजी राष्ट्रीय जंतनाशक दिनी जंतनाशक गोळ्यांचे सेवन करावे, यासाठी सर्व पालकांनी आणि शिक्षकांनी या मोहिमेस सहकार्य करावे, असे आवाहन जिल्हा परिषद अध्यक्षा अस्मिता केंद्रे, उपाध्यक्ष विलास चाळके, मुख्य कार्यकारी अधिकारी वैदेही रानडे आणि जिल्हा आरोग्य अधिकारी डॉ. अनिरुद्ध आठल्ये यांनी केले आहे.
