देवरुख : संगमेश्वर तालुक्यातील कोंड्ये सुवरेवाडी येथे अंगावर काटा आणणारी घटना घडली आहे. कोंबड्यांच्या खोलीत रात्रभर दबा धरून बसलेल्या एका बिबट्याने दुसऱ्या दिवशी दुपारी दरवाजा उघडताच थेट बाहेर झेप घेतली. या अचानक झालेल्या हल्ल्यात बिबट्याचे नख मीना धोंडू सुवरे यांच्या चेहऱ्याला लागल्याने त्या जखमी झाल्या आहेत. सुदैवाने सुवरे या बालंबाल बचावल्‍या असून, या धक्कादायक घटनेमुळे संपूर्ण परिसरात भीतीचे सावट पसरले आहे.
सुवरे यांच्या घराशेजारीच कोंबड्यांसाठी एक भक्कम चिरेबंदी खोली बांधण्यात आली आहे. नेहमीच्या सवयीनुसार संध्याकाळी अंधार पडल्यानंतर कोंबड्या स्वतःहून या खोलीत जातात आणि त्यानंतर घरातील मंडळी दरवाजा बंद करतात. घटनेच्या दिवशी संध्याकाळी दरवाजा बंद करण्यापूर्वीच एक बिबट्या छुप्या मार्गाने या खोलीत शिरला, असा अंदाज व्यक्त केला जात आहे. बिबट्या आत असल्याचे लक्षात न आल्याने घरातील सदस्यांनी नेहमीप्रमाणे बाहेरून दरवाजा लावून घेतला. त्यामुळे बिबट्या रात्रभर त्या चिरेबंदी खोलीतच बंदीस्त राहिला. रात्रभराच्या या मुक्कामात बिबट्याने खोलीतील सर्व कोंबड्या फस्‍त केल्या. यावेळी खोलीत बिबट्या असल्याचा किंचितही संशय घरातील कोणाला आला नाही. दुसऱ्या दिवशी दुपारी मीना सुवरे या नेहमीच्या दिनक्रमाप्रमाणे कोंबड्यांना बाहेर सोडण्यासाठी आणि कामासाठी खोलीचा दरवाजा उघडायला गेल्या. दरवाजा उघडताच नेहमीप्रमाणे कोंबड्या बाहेर येतील, अशी त्यांची अपेक्षा होती. मात्र दरवाजा उघडताच समोरचे दृश्य पाहून त्यांच्या पायाखालची जमीनच सरकली. समोर कोंबड्यांऐवजी रात्रभर बंदीस्त असलेला आणि बाहेर पडण्यासाठी व्याकूळ झालेला बिबट्या उभा होता.
मीना यांनी दरवाजा उघडताच बिबट्याने सुटका करून घेण्यासाठी थेट बाहेरच्या दिशेने झेप घेतली. या धावपळीत बिबट्याचा पंजा आणि नखे मीना यांच्या चेहऱ्याला घासून गेल्याने त्या जखमी झाल्या. अवघ्या काही सेकंदांत घडलेल्या या प्रसंगाने मीना यांची घाबरगुंडी उडाली. सुदैवाने बिबट्याने पुन्हा हल्ला न करता जंगलाच्या दिशेने पळ काढल्यामुळे मोठी जीवितहानी टळली. या हल्ल्यात जखमी झालेल्या मीना सुवरे यांना स्थानिकांनी तत्काळ नजीकच्या फुणगूस प्राथमिक आरोग्य केंद्रात दाखल केले. आरोग्य केंद्रातील डॉक्टरांनी त्यांच्या चेहऱ्यावरील जखमेवर तातडीने वैद्यकीय उपचार केले. तसेच आवश्यक ते प्राथमिक उपचार केले.
या घटनेची माहिती वाऱ्यासारखी पसरताच सुवरेवाडी परिसरातील ग्रामस्थ घटनास्थळी जमा झाले. घराच्या अगदी शेजारी असलेल्या चिरेबंदी खोलीत बिबट्या रात्रभर लपून राहू शकतो, या कल्पनेनेच सर्वजण हादरले आहेत. भविष्यात असा जीवघेणा प्रसंग पुन्हा कोणावरही येऊ नये, यासाठी वन विभागाने या परिसरात तातडीने पिंजरा लावावा, गस्त वाढवावी आणि ठोस प्रतिबंधात्मक उपाययोजना कराव्यात, अशी मागणी सुवरेवाडीतील ग्रामस्थांकडून केली जात आहे.
