खेड : कोकणातील रत्नागिरी जिल्ह्यातील लोटे औद्योगिक वसाहतीमधील एका रासायनिक कारखान्यात आज दुपारी सुमारे दोनच्या सुमारास भीषण आग लागली. या आगीचे लोळ तीन ते चार किलोमीटर अंतरावरूनही स्पष्टपणे दिसत होते, यावरून आगीची तीव्रता स्पष्ट होते.
या दुर्घटनेत लाखो रुपयांचे नुकसान झाल्याची शक्यता व्यक्त केली जात आहे. आगीचे नेमके कारण अद्याप स्पष्ट झालेले नाही. प्राथमिक माहिती नुसार, ही आग लासा कंपनीच्या परिसरात लागली असून त्याचा परिसरातील अन्य कारखान्यांवरही संभाव्य धोका निर्माण झाला आहे.
घटनास्थळी लोटे औद्योगिक वसाहतीचे अग्निशमन दल तातडीने दाखल झाले असून आग नियंत्रणात आणण्याचे प्रयत्न युद्धपातळीवर सुरू आहेत. सुदैवाने अद्याप कोणत्याही जणांच्या अडकले असल्याची माहिती समोर आलेली नाही.
दरम्यान, लोटे औद्योगिक वसाहतीमध्ये अनेक रासायनिक कारखाने कार्यरत असल्याने खबरदारीचा उपाय म्हणून परिसरातील इतर कारखान्यांमध्ये सायरन वाजवून इशारा देण्यात आला आहे. नागरिकांनी आणि कामगारांनी सुरक्षित अंतरावर राहण्याचे आवाहन प्रशासनाने केले आहे. अधिक तपशील व अधिकृत माहिती येणे बाकी असून आग आटोक्यात आल्यावरच संपूर्ण स्थिती स्पष्ट होणार आहे.
