राजापूर : रायपाटण, हॉस्पिटल नजीक असलेल्या गणेश कृपा हॉटेलला अचानक आग लागून संपूर्ण हॉटेल भास्मसात झाल्याची घटना रविवारी सायंकाळी साडेपाचच्या दरम्यान घडली. शॉर्ट सर्किटने हॉटेलला आग लागल्याची शक्यता वर्तविली जात होती.दरम्यान राजापूर नगर परिषदेच्या अग्नीशामक दलाला पाचारण करण्यात आले होते.
सदानंद महादेव गोडेकर यांचे हे हॉटेल असून ते काही निमित्त पाचलला गेले होते. पाचल येथून परत आले असता त्यांना हॉटेलमधून धूर येत असल्याचे दिसला आणि त्यांनी तात्काळ हॉटेलचा दरवाजा उघडला असता आतमध्ये मोठी आग लागल्याचे आढळून आले.
दरम्यान आजूबाजूची मंडळी धावून आली. आग विझवायला सुरवात झाली. मात्र आगीने रौद्र रूप धारण केले होते. आगीत गोडेकर यांचे सर्व साहित्य जळून खाक झाले. दरम्यान ग्रामस्थांनी हॉटेल मधील एक भरलेला आणि दोन रिकामी सिलेंडर तात्काळ बाहेर काढले. आगीत नेमके किती नुकसान झाले ते समजू शकले नाही. सायंकाळी साडेपाचच्या दरम्यान आग लागल्याचे सांगण्यात आले. घटनेची खबर कळताच रायपाटण पोलीस दूरक्षेत्रचे हेड कॉन्स्टेबल कमलाकर पाटील पोलीस कर्मचारी रामदास पाटील घटनास्थळी दाखल झाले होते.शॉर्ट सर्किटने आग लागल्याचे सांगण्यात आले.
