रत्नागिरी : राज्याचे मत्स्य व्यवसाय व बंदरे मंत्री तथा भाजपा नेते नितेश राणे यांनी रत्नागिरीत येत उबाठाला जोरदार दणका दिला असून रत्नागिरी शहरानजीकच्या नाचणे जिल्हा परिषद गटातील उबाठातील अनेक शाखाप्रमुख, महिला पदाधिकार्यांनी भाजपामध्ये प्रवेश केला.
नाचणे जिल्हा परिषद गट हा उबाठा सेनेचा एकेकाळी बालेकिल्ला मानला जायचा. मात्र, भारतीय जनता पक्षाची सुरू असलेली घोडदौड आणि भाजपा नेते ना. नितेश राणे यांच्या आश्वासक नेतृत्वावर विश्वास ठेऊन तेथील उबाठा सेनेच्या पदाधिकार्यांनी भारतीय जनता पक्षामध्ये प्रवेश केला. ना. राणे यांनी त्यांचे जोरदार स्वागत केले.
रत्नागिरीतील भारतीय जनता पार्टीचे पदाधिकारी संदीप सुर्वे यांच्या मार्गदर्शनाखाली नाचणे जिल्हा परिषद गटातील उबाठा गटातील महिला आघाडी, पुरुष पदाधिकारी व कार्यकर्ते यांचा यात समावेश होत. त्यामध्ये ग्रा. पं. सदस्या शिवानी रेमुळकर, विशाल औधकर (शाखाप्रमुख वॉर्ड क्र.3) सुमित पारकर (शाखाप्रमुख वॉर्ड क्र.4), देवराज सुर्वे (उपविभाग प्रमुख, युवासेना) आश्विनी शेलार (महिला आघाडी, शाखा संघटक वॉर्ड क्र.5, प्रमिला ठिक (महिला आघाडी, उपविभाग संघटक, माजी ग्रामपंचायत सदस्य), मंजिरी चव्हाण, (महिला आघाडी, उपशाखा संघटक), सुमन घाणेकर (गटप्रमुख), श्रेया धनोकर (गटप्रमुख) यांच्यासह किरण हातखंबकर, अनघा मोरे, माधुरी तिवारी, संध्या चवंडे, पूजा ठिक यांच्यासह शेकडो कार्यकर्त्यानी प्रवेश केला. यावेळी ना. नितेश राणे यांच्यासह द. रत्नागिरी भाजपा जिल्हाध्यक्ष राजेश सावंत, तालुकाध्यक्ष दादा दळी, विवेक सुर्वे, प्रतीक देसाई, महिला जिल्हाध्यक्षा वर्षा ढेकणे, माजी नगराध्यक्ष महेंद्र मयेकर आदी उपस्थित होते.
