रत्नागिरी : Shimgotsav 2025 | कोकणातील सर्वात मोठा सण आणि कोकणवासीयांच्या जिव्हाळ्याचा विषय असलेला शिमगोत्सवाला खर्या अर्थाने मंगळवारपासून (दि. ११) सुरुवात झाली आहे. मंगळवारी गावोगावी तेरसे शिमगे रंगलेले पहायला मिळाले. तर काही ठिकाणी भद्रेचे शिमगे १४ तारखेला होणार आहेत. ठिकठिकाणी पालखी भेट, होळी उभी करणे, फिरते खेळ पहायला मिळत असून, संपूर्ण कोकणातील वातावरण ढोल-ताशांच्या गजराने घुमत आहे.
गेल्या अनेक वर्षाची परंपरा, चालीरिती यातून साजरा होणार्या शिमगोत्सवाला गेल्या आठ दिवसांपासून सुरुवात झाली आहे. ठिकठिकाणी फाका घुमू लागल्या आहेत. या शिमगोत्सवाला खर्या अर्थाने मंगळवारपासून रंग चढला आहे. तेरसे शिमग्याला सुरुवात झाली आहे. मंगळवारी अनेक ठिकाणी विविध धार्मिक कार्यक्रमाचे आयोजन करण्यात आले. प्रत्येक गावात वेगवेगळ्या प्रथेपरंपरेनुसार हा उत्सव साजरा केला जातो.
या कालावधीत गावोगावी ग्रामदेवतांच्या पालख्या घरभेटी निघतात. फिरते खेळे, संकासूर, गोमू आदी विविध प्रकार साजरे केले जातात. पालख्यांची भेट हा पण एक महत्त्वपूर्ण कार्यक्रम असतो. होळी तोडली जाते. त्यामध्ये आंबा, शिवर यांचा समावेश असतो. ती तोडलेली होळी गावात आणून त्याची विधीवत पूजा केली जाते.
या शिमगोत्सवाला चाकरमानी मोठ्या संख्येने दाखल होतात. कोकणात गणपती उत्सवानंतर शिमगा उत्सव हा मोठा सण आहे. यासाठी बाहेरगावी गेलेले चाकरमानी या उत्सवाचा आनंद लुटण्यासाठी आपल्या गावाकडे धाव घेताना दिसतात. यामुळे ओस पडलेली खेडी यानिमित्त गजबजून गेली आहेत. ग्रामदेवतेच्या जयजयकाराने आणि ढोलताशांच्या आवाजाने परिसर दुमदुमून जात आहे.
