खेड : शहरातील ब्रह्मकुमारी लाईट हाऊस मार्गावरील लाला कडिया रोड येथे शुक्रवार, दि. ६ नोव्हेंबर रोजी दुपारी १ वाजून ४२ मिनिटांच्या सुमारास वणवा लागल्याची घटना घडली. या आगीत ऋग्वेद संदीप घडशी यांच्या मालकीचा बंद असलेला छोटा वाडा आणि तेथे ठेवलेली लाकडे जळून खाक झाली.
आगीची माहिती मिळताच खेड नगरपरिषदेच्या अग्निशमन दलाने घटनास्थळी धाव घेत आग विझविण्यासाठी प्रयत्न सुरू केले. अग्निशमन दलाच्या जवानांनी शर्थीचे प्रयत्न करून आग नियंत्रणात आणली. मात्र, आगीमध्ये संपूर्ण वाडा आणि लाकडे जळून खाक झाली. या घटनेत कोणतीही जीवितहानी झालेली नाही. आग नियंत्रणात आणण्यासाठी खेड नगरपरिषदेचे फायरमन श्याम देवळेकर, दीपक देवळेकर, वाहनचालक गजानन जाधव आणि सहायक फायरमन प्रणव घाग यांनी विशेष प्रयत्न केले. अग्निशमन दलाच्या तत्परतेमुळे आग आटोक्यात आणण्यात यश आले.