खेड : मुंबई-गोवा राष्ट्रीय महामार्गावरील कशेडी घाटाला पर्याय असलेल्या महामार्गावरिल बोगद्यातील बंद करण्यात आलेली वाहतूक शुक्रवारी दि. 28 रोजी पुन्हा सुरू करण्यात आली आहे.
पोलादपूर बाजूला भोगाव हद्दीत गर्डर टाकण्याचे काम सुरू असल्याने महामार्ग प्रशासन व एल अँड टी प्रशासनाकडून कशेडी बोगद्यामार्गे वाहतूक शनिवारी दि. 23 रोजी दुपारी 2.30 वाजताच्या सुमारास वाहतूक बंद करण्यात आली होती. अंदाजे पंधरा दिवस बोगदा व महामार्गावरील अपूर्ण कामे पूर्ण करण्यास लागतील, असे सांगत वाहतूक कशेडी घाटातील बिकट वाटेतून वाहने चालवण्याची वेळ त्यामुळे वाहनचालकांवर आली होती.
कशेडी बोगदा मार्गे जाणार्या नवीन मार्गावर गर्डर टाकण्याचे काम सुरू असल्याने वाहतूक जुन्या मार्गावरून वाहतूक कशेडी बंगलामार्गे वळवून चालू करण्यात आली होती. मात्र, रस्ता नादुरुस्त असल्याने वाहन चालकांनी याबाबत नाराजी व्यक्त करत बांधकाम विभागाने तातडीने लक्ष देण्याची मागणी केली होती. त्यामुळे या मार्गावरील एका मार्गीकेचे गर्डर टाकण्याचे काम पूर्ण झाल्याचे सांगत शुक्रवार दि. 28 रोजी कशेडी बोगदा सर्व वाहनांसाठी खुला करण्यात आला.
कशेडी महामार्ग पोलिस मदत केंद्राचे पोलिस हेड कॉन्स्टेबल शंकर कुंभार व रामागडे यांनी या मार्गावर एका बोगद्यातून वाहने ये - जा करत असल्याचे सांगत बोगद्यात अद्याप काम सुरू असल्याने वाहन चालकांनी वेग मर्यादा पालन करून अपघात टाळणे गरजेचे आहे, असे सांगितले आहे.
मुंबई-गोवा महामार्गावरील कशेडी बोगदा या नवीन मार्गावरून एसटीसह ट्रक टेम्पो कारसह अवजड वाहनांची वाहतूक सुरू करण्यात आली आहे. कशेडी बोगदा मार्गे वाहतूक सुरू झाल्याने वेळेसह इंधनाची बचत होऊन प्रवासही सुसाट होत असल्याने सर्वच वाहनचालक या मार्गाने जाणे पसंत करतात. त्यामुळे जुन्या महामार्गावरील रहदारी कमी झाली आहे.
जुन्या मार्गावरील कशेडी बंगला पंचक्रोशी येथील स्थानिक नागरिक व प्रवाशांना जाण्या येण्यासाठी वाहने मिळत नसल्याने या विभागातील प्रवाशांकडून नाराजीचा सूर उमटत आहे. किमान चिपळूण, खेड व महाड आगारातील एसटी बसेस या कशेडी बंगला मार्गे सोडण्यात याव्या, अशी मागणी या विभागातील नागरिकांकडून केली जात आहे.
