रत्नागिरी : दोपोलीत ४ ठिकाणी घर फोडून चोरट्यांनी लाखोंचा ऐवज केला लंपास
जालगाव, पुढारी वृत्तसेवा : दापोली शहरातील वेगवेगळ्या चार ठिकाणी घरफोडी करून चोरट्याने डल्ला मारला आहे. प्रभू आळी येथील बंद कर फोडून सुमारे 1 लाख 56 हजाराचा ऐवज चोरट्याने लंपास केला आहे. यातील प्रभूआळी या ठिकाणी झालेल्या घरफोडीची घटना 15 ऑगस्ट रोजी संध्याकाळी 6:00 ते 16 ऑगस्ट रोजी सकाळी 7:30 वाजण्याच्या दरम्यान घडली असून या चोरी प्रकरणी एका संशयितास ताब्यात घेतल्याचे वृत्त आहे.
दापोली पोलिसांनी दिलेल्या माहितीनुसार, फिर्यादी शेखर प्रधान (वय 62 रा. प्रभुआळी राम मंदिर) मुंबईला गेले असताना त्यांचे घर बंद होते. या बंद घरात कोणीतरी अज्ञात इसमाने चोरीच्या उद्देशाने घराच्या दाराची कडी कोंडा तसेच लॉक हत्याराने तोडून घरात प्रवेश केला. घरातील बेडरूममध्ये असणाऱ्या लोखंडी कपाटाचा दरवाजा उघडून त्यामधील लॉकरमध्ये ठेवलेली सोन्याचे चांदीच्या वस्तू तसेच रोख रक्कम चोरट्याने लंपास केली. याप्रकरणी रत्नागिरी येथून पोलीस पथक तसेच कस्टम डिपार्टमेंटचे पथक व दापोली पोलीस स्थानकाचे पथक यांची शोध मोहीम सुरू आहे. याप्रकरणी दापोली पोलीस स्थानकाचे पोलीस निरीक्षक विवेक आयरे अधिक तपास करीत आहेत.