डोंबिवली : डोंबिवली जिमखाना रोडला असलेल्या सांगर्लीतील मंदिरात जाऊन तिरूपती बालाजींचे दर्शन घेतल्यानंतर शिवसेना उध्दव बाळासाहेब ठाकरे पक्षाचे कल्याण ग्रामीणमधील उमेदवार सुभाष भोईर यांनी प्रचंड शक्तिप्रदर्शन करत उमेदवारी गुरुवार (दि.24) रोजी अर्ज दाखल केला. तिरूपती बालाजींचा आशिर्वाद आपल्या पाठीशी असल्याने आपण या निवडणुकीत मोठ्या फरकाने निवडून येणार असल्याचा विश्वास भोईर यांनी यावेळी व्यक्त केला.
शिवसेना उध्दव बाळासाहेब ठाकरे पक्षाच्या नुकत्याच जाहीर झालेल्या पहिल्या यादीमध्ये सुभाष भोईर यांची उमेदवारी जाहीर करण्यात आली. त्यानंतर गुरूवारी लगेचच भोईर यांनी शक्तीप्रदर्शन करत आपला उमेदवारी अर्ज कल्याण ग्रामीण विधानसभा मतदार संघाचे निवडणूक निर्णय अधिकारी विश्वास गुजर यांच्याकडे दाखल केला. तत्पूर्वी त्यांनी सांगर्ली येथील मंदिरात जाऊन तिरूपती बालाजीचे दर्शन घेतले. त्यानंतर सांगर्ली येथून सरोवर हॉटेल, शेलार चौकमार्गे घारडा सर्कलपर्यंत ढोल-ताशांच्या गजरात मोठी रॅली काढण्यात आली. वै. हभप संत सावळाराम महाराज म्हात्रे क्रिडा संकुलातील निवडणूक कार्यालयात महाविकास आघाडीच्या विविध पदाधिकाऱ्यांच्या उपस्थितीत सुभाष भोईर यांनी आपला अर्ज दाखल केला. त्यानंतर प्रसिध्दी माध्यमांशी बोलताना भोईर यांनी आपला विजय निश्चित असल्याचा विश्वास व्यक्त केला. यावेळी सुभाष भोईर यांच्यासह संतोष केणे, वंडार पाटील, गुरुनाथ खोत, धनंजय बोडारे, अभिजीत सावंत, माजी नगरसेवक मुकेश पाटील, वसंत भगत यांच्यासह काँग्रेस, राष्ट्रवादी आणि शिवसेना उध्दव बाळासाहेब ठाकरे पक्ष महाविकास आघाडीचे पदाधिकारी आणि कार्यकर्ते मोठ्या संख्येने उपस्थित होते.
