चंद्रपूर : उद्या 15 नोव्हेंबर 2024 रोजी देशाचे गृहमंत्री अमित शहा चंद्रपूरात येत आहे. चांदा क्लब ग्राउंड, चंद्रपूर येथे त्यांची सभा आयोजित करण्यात आली आहे. या सभेकरीता नागरिकांची मोठया प्रमाणात गर्दी होण्याची शक्यता असल्याने सार्वजनिक ठिकाणी सुरळीत रहदारी व सुव्यवस्था राखण्यासाठी करावयाच्या उपाययोजना व नियमनासाठी चंद्रपूर शहरातील वाहतूक व्यवस्थेत बदल करण्यात आला आहे. जिल्हा पोलिस अधिक्षक मुम्मका सुदर्शन यांनी हे आदेश निर्गमित केले आहे.
उद्या 15 नोव्हेंबर रोजी सकाळी 8 ते सांयकाळी 6 वाजेपर्यंत वरोरा नाका ते मित्र नगर चौक तसेच पाण्याची टाकी ते वरोरा नाका पर्यंतचा मार्ग हा सर्व प्रकारच्या वाहनाकरीता बंद राहील. वरील दोन्ही मार्ग ‘नो पार्कींग व नो हॉकर्स झोन’ म्हणून घोषित करण्यात आले आहे. त्यामुळे या मार्गावर कोणत्याही नागरिकांना वाहने पार्कींग करु करता येणार नाही. तसेच या मार्गावर दुकाने, हातठेले लावण्यावर मनाई करण्यात आली आहे. आवश्यकतेनुसार अधिसुचनेच्या मार्गामध्ये व वेळेमध्ये बदल करण्यात येईल. या कालावधीत सर्व वाहतूकदारांनी पर्यायी मार्ग उपलब्ध करण्यात आला आहे.
या कालावधीत नागपूरकडून शहराकडे जाणारी वाहने वरोरा नाका- उड्डाण पूल, सिध्दार्थ हॉटेल-बस स्टॅड - प्रियदर्शनी चौक मार्गे किंवा जिल्हाधिकारी निवासस्थान मार्गे जिल्हा स्टेडियम – मित्र नगर चौक- संत केवलराम चौक मार्गे शहरामध्ये प्रवेश जातील. शहरातून बाहेर जाण्यासाठी नागरिकांनी जटपुरा गेट – प्रियदर्शनी चौक - बसस्टॅण्ड चौक- सिध्दार्थ हॉटेल- उड्डाण पुल –वरोरा नाका मार्गे किंवा संत केवलराम चौक – मित्र नगर चौक – जिल्हा स्टेडियम – जिल्हाधिकारी निवासस्थान मार्गे बाहेर जातील. नागरिकांनी या आदेशाचे पालन करून पोलिस प्रशासनाला सहकार्य करावे, असे आवाहन पोलिस विभागाने केले आहे.
