नगर : शहरात सध्या रस्ताचे कामे सुरू आहेत. त्यासाठी पोलिस वाहतूक नियोजनाचे काम करीत आहेत. तारकपूरकडे जाणाऱ्या रस्त्यावर पोलिस वाहतुकीचे नियमनाचे काम करीत असता शहर वाहतूक शाखेच्या पोलिस कर्मचाऱ्याची गचांडी पकडून दोघांनी मारहाण केली.
ही घटना बुधवारी दुपारी घडली. या तोफखाना पोलिस ठाण्यात गुन्हा दाखल झाला आहे.अमोल संभाजीराव धोंडे (रा.सडे, राहुरी), सुनील सदाशिव पेटारे (रा. वांबोरी, राहुरी) असे गुन्हा दाखल झालेल्यांची नावे आहेत. वाहतूक शाखेचे पोलिस कॉन्स्टेबल अतुल बाजीराव लगड यांनी पोलिसांत फिर्याद दिली. वरिष्ठ अधिकाऱ्यांच्या आदेशानुसार सहकाऱ्यासह तारकपूर ते सिव्हील हॉस्पिटल रस्त्यावरील वाहतूक कोंडी सोडवत असताना आरोपी धोंडे व पेटारे हे एका कारमधून तेथे आले.
रस्त्यातच कार उभी करून वाहतुकीला अडथळा निर्माण केला. त्यामुळे मोठ्या प्रमाणात वाहतूक कोंडी झाली. पोलिस लगड हे कार चालकावर दंडात्मक कारवाईसाठी गेले असता धोंडे याने त्यांची गचांडी पकडून चापटीने मारहाण केली. तसेच, पेटारे याने शिवीगाळ करत सरकारी कामात अडथळा आणल्याचे फिर्यादीत म्हटले आहे.
