छत्रपती संभाजीनगर महामार्गावर गुरुवारी (दि. 24) दुपारी एसटी बस व कंटेनरच्या अपघातात चालकासह 13 जण जखमी झाल्याची घटना घडली. अपघातग्रस्त एसटी बस सांगली आगाराची आहे. छत्रपती संभाजी नगर-सांगली बस (क्रमांक एम. एच. 14 बी. टी. 4793) छत्रपती संभाजीनगरकडून अहिल्यानगरकडे जात होती. बसने समोर चाललेल्या कंटेनरला (क्र. एम. एच.04 एल.क्यु.1463) पाठीमागून जोराची धडक दिली. अपघात घडला त्या ठिकाणी गतिरोधक असल्याने समोरील वाहनाचे अचानक ब्रेक दाबल्याने हा अपघात घडल्याची माहिती प्रत्यक्षदर्शींकडून देण्यात आली.
अपघातामध्ये एसटी बसचे चालक दादासाहेब कोळेकर यांच्यासह 13 जण जखमी झाले आहेत. जखमींमध्ये महिला, तसेच लहान मुलीचाही समावेश आहे. जखमींना जिल्हा शासकीय रुग्णालयात उपचारार्थ दाखल करण्यात आले. त्यासाठी सनी गायकवाड, सचिन पाटोळे यांच्यासह धनगरवाडी येथील स्थानिक ग्रामस्थांनी मदत केली. एमआयडीसी पोलिसांनी अपघातग्रस्त वाहने बाजूला घेऊन वाहतूक सुरळीत केली. अपघातामध्ये एसटी बसचे मोठे नुकसान झाले आहे.
छत्रपती संभाजी नगर महामार्गावर ठिकठिकाणी लहान मोठे खड्डे पडले आहेत. अपघातांची मालिका सुरूच आहे. वारंवार मागणी करूनही रस्ता दुरुस्तीचे काम करण्यात येत नाही. खड्डे बुजविण्याचे काम थातूरमातूर करण्यात आल्याचा आरोप यावेळी नागरिकांकडून करण्यात आला.
तसेच छत्रपती संभाजीनगर महामार्गावरील सर्व खड्डे तत्काळ बुजवा अपघातासाठी धोकादायक असलेल्या विविध चौकांनी रिफ्लेक्टर, सिग्नल लाईट, सूचनाफलक, झेब्रा क्रॉसिंग पट्टे व इतर उपाययोजना करण्याची मागणी स्थानिकांनी केली.
