सना खान खून प्रकरण : चौकशीसाठी बोलावलेले आमदार आलेच नाहीत

नागपूर; पुढारी वृत्तसेवा : भाजप नेत्या सना खान यांच्या खून प्रकरणी पोलिसांनी चौकशी संदर्भात नोटीस दिलेले काँग्रेसचे आमदार संजय शर्मा आज (दि. २३) नागपुरात आलेच नाहीत. मतदारसंघात काही महत्वाच्या कामामुळे आपल्याला आज येता येणार नाही असा निरोप आमदारांनी वरिष्ठ अधिकाऱ्यांना दिला. त्यांच्या या निरोपानंतर आता हे प्रकरण पुन्हा चर्चेत आले आहे.

सना खान यांच्या हत्येनंतर संशयित आरोपी सना यांचा पती पप्पू उर्फ अमित साहू, कुणाच्या संपर्कात होते, त्यांना कोणी आश्रय दिला यादृष्टीने पोलीस पथके तपास करीत आहेत. अजूनही नागपूरच्या मानकापूर पोलिसांची पथके जबलपूर आणि परिसरात तळ ठोकून आहेत. आमदार संजय शर्मा यांच्याशी देखील अमित यांचे निकटचे संबंध असल्याने या चौकशीतून नवी माहिती पुढे येऊ शकते. सना खान यांचा स्वतःच्या राजकीय व आर्थिक लाभासाठी हवा तसा वापर संशयित आरोपी अमित साहू यांनी केला. सनाच्या बेपत्ता मोबाईलमध्ये अनेकांचे आक्षेपार्ह फोटो, क्लिप असल्याचे बोलले जात असल्याने अनेकांची झोपमोड झाली आहे.

सना हत्याकांडानंतर अमित कुठे-कुठे गेला, त्याला कुणी आश्रय दिला यावर आता पोलिसांची नजर आहे. घटनास्थळी फॉरेन्सिक विभागामार्फत पुरावे भक्कम केले जात आहेत. अनेक व्यवसायात असलेल्या अमित शाहूंचे मध्यप्रदेशातील सत्तारूढ भाजप आणि काँग्रेस पदाधिकारी,आमदारांशी अमितचे चांगले संबंध असल्याचे बोलले जात असून याचसंदर्भात नरसिंहपूरचे आमदार संजय शर्मा यांना पोलिसांनी नोटीस दिली होती ते बुधवारी या प्रकरणी चौकशीसाठी नागपुरात येणार असल्याची माहिती या प्रकरणाचा तपास करणारे पोलीस उपायुक्त राहुल मदने यांनी दिली होती.

सनाच्या राजकीय पदाधिकारी, नेत्यांशी असलेल्या ओळखीचा फायदा आपल्या राजकीय स्वार्थासाठी संशयित आरोपी अमित यांनी अनेकदा घेतला हे आता लपून राहिले नाही. दुसरीकडे संशयित आरोपी हत्येनंतर सना यांचा मृतदेह कारने हिरन नदीत नेऊन फेकला असे सांगत असले तरी ते  दिशाभूल करीत असल्याने अजूनही सनाचा मृतदेह सापडला नाही.