पुढारी ऑनलाइन डेस्क : ऐन दसरा दिवाळीच्या तोंडावर मुंबईकरांच्या खिशाला आणखी कात्री लागणार आहे. कारण मुंबईत आजपासून (मंगळवार) सीएनजी (कॉम्प्रेस्ड नॅचरल गॅस) आणि पीएनजी (पाइप्ड नॅचरल गॅस) दोघांचे दर वाढले आहेत. सीएनजी 6 रुपये/किलो तर पीएनज 4 रुपये पर युनिटने दरवाढ होणार आहे. CNG चे सुधारित दर, सर्व करांसहित आता 86 रुपये प्रति किलो आणि घरगुती PNG चे, 52.50 रुपये प्रति मानक घनमीटर (SCM) असतील. 3 ऑक्टोबर मंगळवारच्या मध्यरात्रीपासून नवीन दर लागू होणार आहेत.
केंद्राने नैसर्गिक वायूच्या दरात वाढ केल्यामुळे गॅसच्या किमती खूपच भडकल्या आणि ही वाढलेली किंमत ग्राहकांकडून वसूल करण्याचा निर्णय घेतल्याचे एमजीएलने म्हटले आहे. सीएनजी, पीएनजी दरात वाढ झाली असली तरी पेट्रोलच्या तुलनेत सीएनजी वापरल्यास सुमारे 45 टक्के
बचत होते आणि सिलिंडरऐवजी पीएनजी वापरल्यास होणारी बचत 11 टक्के असल्याचेही महानगर गॅसने स्पष्ट केले आहे.
महानगर गॅस लिमिटेडने (MGL) केलेल्या दरवाढीमुळे सीएनजीवर चालणाऱ्या बस, टॅक्सी, ऑटो आणि खाजगी वाहनांवर आणि पाईपद्वारे स्वयंपाकाचा गॅस वापरणाऱ्या सुमारे 20 लाख कुटुंबांवर बोजा पडेल. 17 ऑगस्ट रोजी, एमजीएलने सीएनजीची किंमत 6 रुपये/किलो आणि पीएनजीची किंमत 4 रुपये/युनिटने कमी केली होती.
दरवाढीचे समर्थन करताना, MGL च्या निवेदनात म्हटले आहे: "…इनपुट गॅसच्या किमतीतील वाढ लक्षणीयरीत्या मोठी असल्याने, MGL ने अशा वाढलेल्या इनपुट गॅसच्या किमती हळूहळू वसूल करण्याचा निर्णय घेतला आहे… .वाढीनंतरही, CNG ची सुधारित MRP मुंबईतील सध्याच्या किमतीच्या पातळीवर पेट्रोलच्या तुलनेत सुमारे 45% बचत ऑफर करते. MGL ची घरगुती PNG घरगुती LPG च्या सध्याच्या MRP च्या तुलनेत सुमारे 11% बचत देईल…"
MGL ने वाढीमागील कारण पुष्टी करताना सांगितले की, पेट्रोलियम प्राइसिंग मेकॅनिझम (APM) अंतर्गत घरगुती उत्पादित गॅसची किंमत 1 ऑक्टोबर 2022 पासून सुधारित करण्यात आली आहे. सुधारित किंमत 40% ची वाढ दर्शवते.
"याशिवाय, CNG आणि PNG विभागांसाठी APM गॅसचे वाटप देखील एकाच वेळी 10% ने कमी केले आहे ज्यामुळे MGL ला वाढत्या मागणीची पूर्तता करण्यासाठी बर्‍याच जास्त किमतीत पुनर्गॅसिफाइड लिक्विड नैसर्गिक वायूचा स्रोत घेणे आवश्यक आहे," असे MGL ने सांगितले.
MGL ने दरवाढी मागचे स्पष्टीकरण दिले असले तरी सध्या नवरात्री उत्सव सुरू आहे. दसरा, कोजागिरी, नंतर दिवाळी लागोपाठ सण उत्सवाच्या काळात वाढत्या महागाईमुळे आधीच जनता त्रस्त आहे. त्यामुळे या दरवाढीमुळे मुंबईकरांच्या खिशाला मोठा फटका बसणार आहे.
