ठाणे : पुढारी वृत्तसेवा भिवंडीत दर्गा रोड या ठिकाणी (शनिवार) मध्यरात्री एक मजली इमारत कोसळली. या दुर्घटनेत दोघांचा मृत्यू झाला, तर 5 व्यक्ती जखमी झाल्या आहेत. इमारत कोसळल्यानंतर ढिगाऱ्याखाली 7 रहिवासी अडकले गेले. दुर्घटनेची माहिती समजताच ठाणे आपत्ती व्यवस्थापनाची टीम, भिवंडी अग्निशमन विभागाच्या जवानांनी तातडीने बचाव कार्य सुरू केले.
इमारतीच्या ढिगाऱ्याखाली अडकलेल्या सर्व लोकांना बाहेर काढण्यात आले असून, पहाटे ३:३० वाजण्याच्या सुमारास संपूर्ण बचावकार्य थांबविण्यात आले असे भिवंडी अग्निशमन दलाच्या जवानांनी माहिती दिली.
मृतांमध्ये एक 8 महिन्यांच्या मुलीचा समावेश असुन, जखमींमध्ये 3 आणि 7 वर्षांच्या मुलींचा समावेश आहे. तर एकूण मृत आणि जखमींमध्ये केवळ एका पुरुषाचा तर बाकी सर्व महिला आहेत. जखमींना भिवंडी येथील अल मोईन रुग्णालयात दाखल करण्यात आले आहे.
जखमींपैकी 3 वर्षांची उरुसा अतिफ मोमीन हिच्यावर आय. जी. एम. रुग्णालय, भिवंडी येथे उपचार सुरू होते, प्रकृती स्थिर असल्याने घरी सोडण्यात आले.
मृत व्यक्तींची नावे
१) श्रीमती उझमा आतिफ मोमीन (स्त्री : वय ४० वर्षे)
२) कुमारी तस्लिमा मौसर मोमीन (स्त्री : वय ८ महिने)
जखमी व्यक्तींची नावे
१) मोमिन लतीफ़ (पु/ वय ६५ वर्षे)
२)श्रीमती फरझाना अब्दुल लतीफ (स्त्री / वय ५० वर्षे)
३)श्रीमती बुशरा अतिफ लतिफ (स्त्री / वय ३२ वर्षे)
४) कुमारी आदिमा अतिफ मोमीन (स्त्री / वय ०७ वर्षे)
५) कुमारी उरुसा अतिफ मोमीन (स्त्री / वय ०३ वर्षे)
