पुढारी ऑनलाईन डेस्क : अमेरिकेच्या काही भागांमध्ये वादळांनी थैमान घातले, अनेक राज्यांमध्ये शाळा उध्वस्त केल्या आणि सेमीट्रॅक्टर-ट्रेलर्स उध्वस्त केले. शनिवारी (दि.15) उशिरा हवामान अधिक तीव्र झाल्याने या महाकाय वादळात किमान ३२ लोकांचा मृत्यू झाला आहे. अशी माहिती 'एपी' या वृत्तसंस्थेने दिली आहे.
एजन्सीने सांगितले की, या वादळात अनेक लोक जखमीही झाले आहेत. अर्कांसस अधिकाऱ्यांनी शनिवारी सकाळी सांगितले की, इंडिपेंडन्स काउंटीमध्ये तीन जणांचा मृत्यू झाला आहे आणि आठ काउंटीमध्ये ५० हून अधिक जण जखमी झाले आहेत. अर्कांससच्या सार्वजनिक सुरक्षा विभागाने एका निवेदनात म्हटले आहे की, राज्यातील १६ काउंटींमध्ये घरे आणि व्यवसायांचे तसेच वीज तारा आणि झाडे कोसळल्याचे वृत्त आहे.
टेक्सास पॅनहँडलमधील अमरिलो काउंटीमध्ये धुळीच्या वादळादरम्यान झालेल्या कार अपघातात सात जणांचा मृत्यू झाला, असे अधिकाऱ्यांनी सांगितले. तत्पूर्वी, मिसूरी स्टेट हायवे पेट्रोलने सांगितले की, मिसूरीच्या बेकर्सफील्ड भागात वादळामुळे किमान दोन जणांचा मृत्यू झाला आहे आणि अनेक जण जखमी झाले आहेत. मिसूरीमधील बटलर काउंटीचे कोरोनर जिम एकर्स यांनी सांगितले की, शनिवारी सकाळी बेकर्सफील्डच्या पूर्वेला सुमारे १७७ मैल अंतरावर असलेल्या एका घरावर वादळ कोसळल्याने एकाचा मृत्यू झाला. अकर्स म्हणाले की, बचाव पथकांना घरात असलेल्या एका महिलेला वाचवण्यात यश आले. अर्कान्सासच्या केव्ह सिटी भागात पाच जण जखमी झाले आहेत, जिथे पुढील सूचना मिळेपर्यंत आणीबाणी लागू करण्यात आली आहे, असे महापौर जोनास अँडरसन यांनी शनिवारी सकाळी सोशल मीडियावर सांगितले. राज्यभरात १३० हून अधिक आगी लागल्याने ओक्लाहोमाच्या काही समुदायांमधील लोकांना परिसर सोडण्याचा सल्ला देण्यात आला.
