वॉशिंग्टन : मध्यपूर्वेत सुरू असलेल्या संघर्षाच्या पार्श्वभूमीवर अमेरिकेने इराणकडे अतिरिक्त सैन्य पाठवण्याचा निर्णय घेतला आहे. पुढील काही दिवसांत हजारो अमेरिकन सैनिक या भागात दाखल होणार असल्याची माहिती अधिकार्यांनी दिली आहे. सहा आठवड्यांहून अधिक काळ चाललेल्या संघर्षाचा शेवट करण्यासाठी सुरू असलेल्या चर्चांच्या पार्श्वभूमीवर ही लष्करी हालचाल महत्त्वाची मानली जात आहे.
पेंटागॉनने सुमारे 6,000 सैनिकांसह ‘यूएसएस जॉर्ज एचडब्ल्यू बुश’ या विमानवाहू नौकेसह इतर युद्धनौका आधीच तैनात केल्या आहेत. याशिवाय ‘बॉक्सर ग्रुप’ आणि ‘11वी मरीन एक्स्पेडिशनरी ग्रुप’ मधील आणखी 4,200 सैनिक या महिन्याच्या अखेरीस या भागात पोहोचणार आहेत. त्यामुळे या प्रदेशातील अमेरिकन लष्करी उपस्थिती आणखी मजबूत होणार आहे.
सध्या इराणविरोधातील कारवाईसाठी सुमारे 50,000 अमेरिकन सैनिक विविध ठिकाणी कार्यरत आहेत. नव्या तैनातीमुळे हा आकडा आणखी वाढणार असून, यामुळे अमेरिकेचा दबाव वाढवण्याचा प्रयत्न असल्याचे मानले जात आहे.
सध्या लागू असलेला युद्धविराम 22 एप्रिल रोजी संपणार आहे. त्यानंतर परिस्थिती कशी बदलते याकडे जगाचे लक्ष लागले आहे. तणाव कमी होणार की संघर्ष आणखी तीव्र होणार, याबाबत अनिश्चितता कायम आहे.
