crude oil price drop
नवी दिल्ली : पश्चिम आशियातील गंभीर भू-राजकीय तणावाच्या पार्श्वभूमीवर जागतिक ऊर्जा बाजारपेठेतून एक दिलासादायक वृत्त समोर आले आहे. अमेरिकेचे राष्ट्राध्यक्ष डोनाल्ड ट्रम्प यांनी इराणमधील ऊर्जा प्रकल्प आणि पायाभूत सुविधांवर नियोजित असलेले लष्करी हल्ले टाळण्याचे आदेश दिले आहेत. या निर्णयामुळे जागतिक स्तरावर कच्च्या तेलाच्या किमतीत मोठी घसरण नोंदवण्यात आली आहे.
बाजारातील ताज्या आकडेवारीनुसार, अमेरिकेच्या या निर्णयानंतर तेलाच्या किमतीत एकूण १५ टक्क्यांहून अधिक घसरण झाली आहे. तणाव कमी झाल्याचा (De-escalation) थेट परिणाम दोन्ही प्रमुख तेल बेंचमार्कवर दिसून आला. जागतिक बेंचमार्क ब्रेंट क्रूडच्या वायदा दरात सुमारे १७ डॉलर म्हणजेच १५ टक्क्यांची मोठी घसरण झाली. यामुळे किंमत प्रति बॅरल ९६ डॉलर या सत्रातील नीचांकी पातळीवर पोहोचली. दरम्यान, डब्ल्यूटीआय क्रूड (WTI Crude): अमेरिकन बेंचमार्क वेस्ट टेक्सास इंटरमीडिएटमध्येही (WTI) मोठी घसरण झाली. हे दर १३ डॉलर किंवा सुमारे १३.५ टक्क्यांनी घसरून प्रति बॅरल ८५.२८ डॉलरवर आले.
मध्यपूर्वेतील वाढत्या संघर्षामुळे तेलाच्या किमतींनी प्रति बॅरल १०० डॉलरचा टप्पा ओलांडला होता. या दरवाढीचे मुख्य कारण इराणने व्यापारी जहाजांवर केलेले हल्ले हे होते. या हल्ल्यांमुळे जगातील सर्वात महत्त्वाचा तेल व्यापारी मार्ग असलेल्या 'हॉर्मुझची सामुद्रधुनी' (Strait of Hormuz) व्यावहारिकदृष्ट्या बंद झाली होती. पुरवठा खंडित होण्याच्या या थेट धोक्यामुळे जागतिक स्तरावर ऊर्जा संकटाची परिस्थिती निर्माण झाली होती.
इराण- अमेरिका तणाव कमी होत असल्याचे संकेत मिळत असल्याने ऊर्जा बाजार स्थिर होण्यास मदत होत आहे. तेलाच्या किमतीत सुधारणा झाली असली, तरी बाजाराचे लक्ष अजूनही हॉर्मुझच्या सामुद्रधुनीतील स्थिती आणि अमेरिका-इराणमधील पुढील राजनैतिक हालचालींकडे लागलेले आहे. या भागातील जहाजांची वाहतूक पूर्णपणे सामान्य झाली, तर कच्च्या तेलाच्या किमतीत आणखी स्थिरता येण्याची शक्यता वर्तवली जात आहे.
