न्यूयॉर्क : अमेरिकेचे राष्ट्राध्यक्ष डोनाल्ड ट्रम्प यांनी भारताच्या उच्च कर धोरणाबद्दल त्यांची भूमिका पुन्हा एकदा स्पष्ट केली आहे. तसेच, त्यांनी पंतप्रधान नरेंद्र मोदी यांचे कौतुक करत, ते एक उत्तम मित्र आणि ते खूप स्मार्ट व्यक्ती असल्याचे म्हटले आहे. जरी त्यांच्या प्रशासनाने भारतीय उत्पादनांवर परस्पर (रेसिप्रोकल) शुल्क लागू करण्यावर जोर दिला असला, तरी दोन्ही देशांदरम्यान सुरू असलेल्या द्विपक्षीय व्यापार चर्चेतून सकारात्मक तोडगा निघेल, असा विश्वास ट्रम्प यांनी व्हाईट हाऊसमध्ये पत्रकारांशी बोलताना व्यक्त केला.
पीएम मोदी नुकतेच अमेरिका दौर्यावर आले होते. आम्ही दोघे खूप चांगले मित्र आहोत. भारत हा जगातील सर्वाधिक कर आकारणार्या देशांपैकी एक आहे. ते खूप स्मार्ट आहेत, असे ट्रम्प म्हणाले. मला आशा वाटते की, भारत आणि अमेरिकेच्या द्विपक्षीय चर्चेतून चांगले काही तरी समोर येईल. तसेच, मी असे म्हणू इच्छितो की, तुम्हाला एक महान पंतप्रधान मिळाला आहे.
