Powerful 7.7 magnitude earthquake in Indonesia; 2 dead, tsunami warning issued
पुढारी ऑनलाईन : इंडोनेशियाच्या किनारपट्टीजवळ शनिवारी पहाटे 7.7 तीव्रतेचा शक्तिशाली भूकंप झाला. या भूकंपात आतापर्यंत दोन जणांचा मृत्यू झाल्याची माहिती आहे. भूकंपानंतर त्सुनामीचा धोका लक्षात घेता इशारा जारी करण्यात आला आहे. भूकंपानंतर अनेक आफ्टरशॉक्सही जाणवले. युरोपियन-मेडिटेरेनियन सिस्मोलॉजिकल सेंटर म्हणजेच EMSC नुसार, भूकंपाचा केंद्रबिंदू समुद्राच्या आत सुमारे 35 किलोमीटर खोलीवर होता.
EMSC च्या माहितीनुसार, स्थानिक वेळेनुसार पहाटे सुमारे 4:58 वाजता भूकंपाची नोंद झाली. मुख्य भूकंपानंतर किमान तीन आफ्टरशॉक्स म्हणजेच भूकंपाचे धक्केही नोंदवण्यात आले आहेत. त्यामुळे जमिनीखालील हालचाली अद्याप सुरू असून आगामी काळात आणखी धक्के जाणवण्याची शक्यता आहे.
इंडोनेशियाच्या हवामान आणि भूभौतिकी एजन्सी BMKG ने या समुद्री भूकंपानंतर देशातील काही भागांसाठी तातडीने त्सुनामीचा इशारा जारी केला. एजन्सीच्या पथकांकडून परिस्थितीवर सातत्याने लक्ष ठेवले जात आहे. तसेच भूकंप आणि त्यानंतरच्या धक्क्यांचा कोणत्या भागांवर सर्वाधिक परिणाम होऊ शकतो, याचेही मूल्यांकन केले जात आहे.
दरम्यान, ऑस्ट्रेलियाच्या त्सुनामी इशारा देणाऱ्या एजन्सीने स्पष्ट केले आहे की, या भूकंपामुळे ऑस्ट्रेलियाच्या मुख्य भूमीला, बेटांना किंवा इतर भागांना त्सुनामीचा धोका नाही. त्यामुळे ऑस्ट्रेलियात सध्या परिस्थिती नियंत्रणात आहे.
भूकंप समुद्राच्या आत झाल्याने इंडोनेशियातील जमिनीवर त्याचा नेमका किती परिणाम झाला आहे, हे अद्याप स्पष्ट झालेले नाही. जीवित किंवा मालमत्तेच्या नुकसानीबाबतची सविस्तर माहिती अद्याप समोर आलेली नाही. अधिकारी परिस्थितीवर बारकाईने लक्ष ठेवून असून पुढील माहितीची प्रतीक्षा केली जात आहे.
इंडोनेशिया भूकंप आणि ज्वालामुखीच्या हालचालींसाठी संवेदनशील देश मानला जातो. याचे कारण म्हणजे हा देश प्रशांत महासागराच्या परिसरातील ज्वालामुखी आणि फॉल्ट लाइन्सच्या कमानीवर म्हणजेच ‘रिंग ऑफ फायर’ भागात स्थित आहे.
