pakistan afghanistan conflict taliban durand line post captured
पुढारी ऑनलाईन :
तालिबानने पाकिस्तानवर भीषण हल्ला केला असून ड्युरंड रेषेवरील आणखी दोन चौक्या ताब्यात घेतल्या आहेत. यापूर्वी तालिबान सैन्याने रावळपिंडीतील नूर खान एअर बेसवर पाकिस्तानच्या कमांड आणि कंट्रोल सेंटरला लक्ष्य करत शस्त्रसज्ज ड्रोन हल्ले केले होते.
पाकिस्तानला अफगाणिस्तानातील तालिबानकडून आणखी एक मोठा धक्का बसला आहे. तालिबानने ड्युरंड लाईनवरील दोन पोस्ट्स ताब्यात घेतल्याचा दावा केला आहे. टोलो न्यूजच्या वृत्तानुसार, इस्लामिक अमिरात ऑफ अफगानिस्तानच्या सैन्याने कंधार प्रांतातील स्पिन बोल्डक आणि शोराबक जिल्ह्यांमध्ये तथाकथित ड्युरंड रेषेजवळील पाकिस्तानी लष्करी पोस्ट्सवर कब्जा केला आहे.
पाकिस्तान आणि अफगानिस्तानमधील तणाव आणखी वाढला, जेव्हा अफगाण तालिबान सैन्याने रावळपिंडीतील नूर खान एअर बेसवर पाकिस्तानच्या कमांड आणि कंट्रोल सेंटरवर शस्त्रसज्ज ड्रोन हल्ले केले. ही घटना विशेषतः संवेदनशील मानली जात आहे, कारण नूर खान एअर बेस हा ऑपरेशन सिंदूरदरम्यान भारतीय सैन्याने लक्ष्य केलेल्या पाकिस्तानी लष्करी ठिकाणांपैकी एक होता.
मे २०२५ मध्ये भारत आणि पाकिस्तान यांच्यात झालेल्या चार दिवसांच्या अल्पकालीन पण तीव्र संघर्षाला नऊ महिने उलटूनही, त्या बेसवर पुनर्बांधणीचे काम सुरू होते. अफगाण तालिबानच्या नव्या हल्ल्याच्या बातमीमुळे दुरुस्तीचे काम धोक्यात आले असून आणखी नुकसान झाल्याचे सांगितले जाते.
अफगानिस्तानच्या नॅशनल डिफेन्स मिनिस्ट्रीच्या अधिकृत X (ट्विटर) खात्यानुसार, तालिबान सैन्याने क्वेटा येथील १२ व्या डिव्हिजनच्या मुख्यालयावर तसेच खैबर पख्तूनख्वामधील इतर पाकिस्तानी लष्करी ठिकाणांवर ड्रोन हल्ले केले.
मंत्रालयाने म्हटले आहे, “आज नॅशनल डिफेन्स मिनिस्ट्रीच्या एअर फोर्सने पाकिस्तानमधील महत्त्वाच्या लष्करी ठिकाणांवर अचूक आणि समन्वयित हवाई कारवाया केल्या. यात रावळपिंडीतील नूर खान एअर बेस, क्वेटा (बलुचिस्तान) येथील १२ व्या डिव्हिजनचे मुख्यालय, खैबर पख्तूनख्वातील मोहमंद एजन्सीतील ख्वाजाई कॅम्प तसेच इतर अनेक महत्त्वाच्या पाकिस्तानी लष्करी ठिकाणे आणि कमांड सेंटर्सना लक्ष्य करण्यात आले.”
याआधी तालिबान अधिकाऱ्यांनी दावा केला होता की पूर्व अफगानिस्तानातील जलालाबाद शहरात एक पाकिस्तानी फायटर जेट पाडण्यात आला. वृत्तसंस्था AFP ने सांगितले की, पायलटने पॅराशूटने विमानातून उडी मारल्यानंतर त्याला जिवंत पकडण्यात आले. स्थानिक लोकांनी AFP ला सांगितले की, लँडिंग होताच पायलटला ताब्यात घेण्यात आले. हा सगळा प्रकार दोन्ही देशांमधील वाढत्या सीमापार शत्रुत्वाच्या पार्श्वभूमीवर घडला आहे.
शुक्रवारी पाकिस्तानने अफगानिस्तानची राजधानी काबूल आणि दक्षिणेकडील कंधार शहरावर हवाई हल्ले केले, जिथे तालिबानचे सर्वोच्च नेते हिबतुल्लाह अखुंदझादा यांचे ठिकाण असल्याचे सांगितले जाते. पाकिस्तानी सरकारच्या एका प्रवक्त्याने सांगितले की, या हल्ल्यांमध्ये १३३ तालिबान लढवय्ये ठार झाले, २०० हून अधिक जखमी झाले आणि अनेक चौक्या उद्ध्वस्त करण्यात आल्या किंवा ताब्यात घेण्यात आल्या.
