पुढारी ऑनलाईन डेस्क : नासा आणि स्पेसएक्सचे क्रू-१० मिशनचे यान आंतरराष्ट्रीय अंतराळ स्थानकात पोहोचले आहे. फाल्कन ९ रॉकेटमधून गेलेल्या या मोहिमेतील चारही सदस्य अंतराळ स्थानकात पोहोचले आहेत. डॉकिंग आणि हॅच उघडल्यानंतर, चार अंतराळवीर क्रू-९ मोहिमेतील अंतराळवीरांना भेटून त्यांची गळाभेट घेतली. नासाच्या म्हणण्यानुसार, नऊ महिन्यांपासून अवकाशात अडकलेल्या सुनीता विल्यम्स आणि बुच विल्मोर बुधवारी (दि.19) पृथ्वीवर रवाना होतील. नासाने म्हटले आहे की, हवामान अनुकूल असल्यास, विल्मोर, विल्यम्स आणि इतर दोन अंतराळवीरांना घेऊन जाणारे स्पेसएक्स कॅप्सूल बुधवारपूर्वी अंतराळ स्थानकापासून वेगळे होईल आणि फ्लोरिडाच्या किनाऱ्यावर उतरेल.
शनिवारी नासा आणि स्पेसएक्सचे क्रू-१० मिशन फाल्कन ९ रॉकेटमधून आंतरराष्ट्रीय अंतराळ स्थानकाकडे रवाना झाले. या मोहिमेत अॅन मॅकलेन, निकोल आयर्स, जपानी अंतराळवीर ताकुया ओनिशी आणि रशियन अंतराळवीर किरिल पेस्कोव्ह यांचा समावेश आहे. असे म्हटले जाते की क्रू-१० मिशन आंतरराष्ट्रीय स्थानकावर पोहोचले आहे. यशस्वीरित्या डॉकिंग आणि हॅच उघडल्यानंतर, चारही अंतराळवीरांनी स्टेशनमध्ये प्रवेश केला.
५ जून २०२४ रोजी, नासाचे बोईंग क्रू फ्लाइट टेस्ट मिशन लाँच करण्यात आले. या मोहिमेअंतर्गत, नासाने त्यांचे दोन अंतराळवीर सुनीता विल्यम्स आणि बॅरी बुच विल्मोर यांना आठ दिवसांच्या सहलीवर पाठवले. दोघांनाही स्टारलाइनर अंतराळयानातून मोहिमेवर पाठवण्यात आले. स्टारलाइनर अंतराळयानाचे अंतराळवीरांसह आंतरराष्ट्रीय अंतराळ स्थानकावर (ISS) जाणारे हे पहिले उड्डाण होते. सुनीता आणि बॅरी ज्या मोहिमेवर आहेत ते नासाच्या कमर्शियल क्रू प्रोग्रामचा भाग आहे. खरं तर, अमेरिकन खाजगी उद्योगांच्या भागीदारीत अमेरिकेतून आंतरराष्ट्रीय अंतराळ स्थानकावर सुरक्षित, विश्वासार्ह आणि कमी किमतीच्या मानवयुक्त मोहिमा पाठवणे हे नासाचे ध्येय आहे. हे चाचणी अभियान याच उद्देशाने सुरू करण्यात आले होते.
