प्योंगयांग; वृत्तसंस्था : उत्तर कोरियामध्ये किम जोंग उन यांची सलग तिसर्यांदा स्टेट अफेअर्सचे अध्यक्ष म्हणून फेरनिवड करण्यात आली आहे. प्योंगयांग येथे झालेल्या 15 व्या सुप्रीम पीपल्स असेंब्लीच्या पहिल्याच अधिवेशनात ही घोषणा करण्यात आली. या निवडीसोबतच किम जोंग उन यांनी देशाच्या संविधानात मोठे बदल करून दक्षिण कोरियासोबतचे संबंध कायमचे तोडण्याचे संकेत दिले आहेत.
महत्त्वाचे निर्णय आणि संवैधानिक बदल
2016 मध्ये स्थापन झालेल्या देशातील सर्वात शक्तिशाली स्टेट अफेअर्स कमिशनच्या अध्यक्षपदी किम यांची पुन्हा नियुक्ती झाली आहे. त्यांच्या या कार्यकाळात त्यांनी आपल्या जवळच्या सहकार्यांची प्रशासनात वर्णी लावली आहे.
दक्षिण कोरिया शत्रू राष्ट्र घोषित करण्याच्या हालचाली
उत्तर कोरिया आता आपल्या समाजवादी संविधानात दुरुस्ती करून दक्षिण कोरियाला अधिकृतपणे शत्रू राष्ट्र म्हणून घोषित करण्यावर विचार करत आहे. यापूर्वी किम यांनी दोन्ही कोरियांच्या शांततापूर्ण एकत्रिकरणाचे धोरण पूर्णपणे गुंडाळून ठेवले आहे. दरम्यान, संविधानातील नवीन बदलांनुसार, उत्तर कोरिया आपल्या सागरी आणि हवाई सीमांची नव्याने व्याख्या करणार आहे, ज्यामुळे या भागात लष्करी तणाव वाढण्याची शक्यता आहे.
प्रशासकीय फेरबदल
या बैठकीत किम जोंग उन यांचे अत्यंत विश्वासू सहकारी जो योंग-वोन यांना संसदीय स्थायी समितीचे अध्यक्ष बनवण्यात आले आहे. तर, किम यांची धाकटी बहीण किम यो-जोंग यांना स्टेट अफेअर्स कमिशनच्या सदस्यपदावरून कार्यमुक्त करून नवीन जबाबदारी देण्याचे संकेत दिले आहेत.या बदलांमुळे उत्तर कोरिया आता अधिक आक्रमक लष्करी धोरण स्वीकारणार असल्याचे स्पष्ट होत असून, दक्षिण कोरिया आणि अमेरिकेसाठी ही धोक्याची घंटा मानली जात आहे.
