पुढारी ऑनलाईन डेस्क : जपानचे पंतप्रधान फुमियो किशिदा यांनी पुढील महिन्यात पंतप्रधानपदावरून पायउतार होण्याची घोषणा केली आहे. त्यांनी सत्ताधारी लिबरल डेमोक्रॅटिक पक्षाचे अध्यक्ष म्हणून पुन्हा निवडणूक न घेण्याचा निर्णय घेतला आहे.
माध्यमांशी बोलताना फूमियो किशिदा म्हणाले की, मी सत्ताधारी लिबरल डेमोक्रॅटिक पार्टी (एलडीपी) च्या अध्यक्षपदासाठी निवडणूक लढवणार नाही. पुढच्या महिन्यात नवीन अध्यक्ष निवडल्यानंतर मी पंतप्रधानपदाचा राजीनामा देईन. सत्ताधारी लिबरल डेमोक्रॅटिक पक्ष सध्या विविध कारणांमुळे चर्चेत आहेत. विवादास्पद युनिफिकेशन चर्चशी एलडीपीचे संबंध आणि राजकीय निधीमध्ये झालेला घोटाळा हा बहुचर्चित ठरला आहे. पक्ष निधी उभारणीच्या कार्यक्रमांमध्ये केलेल्या राजकीय देणग्यांबद्दल किशिदाचा सार्वजनिक पाठिंबा घसरला आहे. त्यामुळे किशिदा सरकारच्या विरोधात पक्षातूनच निषेधाचे आवाज उठवले जात आहेत. सध्याच्या सरकारच्या नेतृत्वाखाली पुढील सार्वत्रिक निवडणुका जिंकणे फार कठीण असल्याचे पक्षातील नेते म्हणत आहेत. जपानमध्ये ऑक्टोबर २०२४ मध्ये निवडणुका होणार आहेत.
योशिहिदे सुगाची यांच्या जागी फुमिया किशिदा यांनी ऑक्टोबर २०२१ मध्ये जपानच्या पंतप्रधानपदाची सूत्रे हाती घेतली होती. गेल्या एप्रिलमध्ये जपानमधील नागासाकी, शिमाने आणि टोकियो शहरांचा पोटनिवडणुका झाल्या. त्यामध्ये सत्ताधारी 'एलडीपी'ला पराभवाचा सामना करावा लागला होता. त्यावेळीही किशिदा यांच्या राजीनाम्याची मागणी करण्यात आली होती, मात्र किशिदा यांनी त्यावेळी पद सोडण्यास नकार दिला होता. अनेक दिवसांपासून किशिदा यांच्यावर पायउतार होण्याचा दबाव होता आणि आता अखेर त्यांनी पायउतार होण्याचा निर्णय जाहीर केले.
२०२१मध्ये जपानमध्ये कोरोना संकट काळात किशिदा यांनी पंतप्रधानपदाची सूत्रे स्वीकारली होती. त्यांनी मोठ्या प्रमाणावर प्रोत्साहन खर्च करून जपानला कोविड महामारीतून बाहेर काढले. 2022 मध्ये हत्या झालेल्या माजी पंतप्रधान शिन्झो आबे यांच्या सुरक्षा धोरण त्यांनी कायम ठेवले. दुसऱ्या महायुद्धानंतरच्या जपानच्या सर्वात मोठ्या लष्करी उभारणीचे अनावरणही त्यांनी केले. संरक्षण खर्च दुप्पट करण्याच्या वचनबद्धतेसह शेजारच्या चीनला पूर्व आशियातील आपल्या प्रादेशिक महत्त्वाकांक्षा लष्करी बळाद्वारे पाठपुरावा करण्यापासून परावृत्त करण्यात त्यांचा सहभाग होता. अमेरिकेच्या मदतीने त्यांनी जपानचे दक्षिण कोरियासोबतचे ताणलेले संबंध सुधारले, ज्यामुळे उत्तर कोरियाच्या क्षेपणास्त्र आणि अण्वस्त्र कार्यक्रमांमुळे उद्भवलेल्या धोक्याचा सामना करण्यासाठी दोन्ही देश आणि त्यांचे परस्पर सहयोगी, यूएस यांना सखोल सुरक्षा सहकार्याचा पाठपुरावा करण्यास सक्षम केले. काझुओ उएडा यांची बँक ऑफ जपान (बीओजे) चे प्रमुख म्हणून नियुक्ती केली. ज्याला त्यांच्या पूर्ववर्तींचे मूलगामी आर्थिक उत्तेजन संपविण्याचे काम देण्यात आले होते.जुलैमध्ये BOJ ने अनपेक्षितपणे व्याजदर वाढवले कारण महागाई वाढली, शेअर बाजाराच्या अस्थिरतेला हातभार लावला आणि राष्ट्रीय चलन येनची झपाट्याने घसरण झाली आहे. याचाही फटका त्यांच्या नेतृत्त्वाला बसल्याचे मानले जात आहे.
