बेरूत (लेबनॉन); वृत्तसंस्था : अमेरिका आणि इस्रायलने इराणविरोधात सुरू केलेल्या व्यापक युद्धाच्या पार्श्वभूमीवर लेबनॉनमध्ये इस्रायलचे हल्ले अधिक तीव्र झाले आहेत. राजधानी बेरूत आणि दक्षिण लेबनॉनमध्ये झालेल्या ताज्या हवाई हल्ल्यांत किमान 16 जणांचा मृत्यू झाला असून, अनेक जण जखमी झाले आहेत. गेल्या दोन आठवड्यांपासून सुरू असलेल्या हल्ल्यांमुळे परिस्थिती अत्यंत गंभीर बनली आहे.
शुक्रवारी पहाटे इस्रायलने बेरूतच्या नैऋत्येकडील किनारी भाग जना परिसरात एका कारवर हवाई हल्ला केला. लेबनॉनच्या आरोग्य मंत्रालयाच्या माहितीनुसार या हल्ल्यात एका व्यक्तीचा मृत्यू झाला. हा हल्ला अत्यंत अचूक पद्धतीने करण्यात आल्याचे स्थानिक अधिकार्यांनी सांगितले.
बेरूतमधील नबा परिसरातील एका निवासी अपार्टमेंटवरही इस्रायली हल्ला झाला. या भागात मोठ्या प्रमाणावर आर्मेनियन समुदाय राहतो. हल्ल्यानंतर इमारतीला भीषण आग लागली. मात्र, सुदैवाने कोणतीही जीवितहानी झाल्याचे वृत्त नाही.
या संघर्षात किंवा 2024 मधील हिजबुल्ला-इस्रायल युद्धात हा परिसर प्रथमच लक्ष्य करण्यात आल्याचे स्थानिक वृत्तांत सांगतात.
इस्रायली हल्ल्यांमुळे गेल्या दोन आठवड्यांत लेबनॉनमध्ये किमान 687 लोकांचा मृत्यू झाला आहे. यात 98 लहान मुलांचा समावेश आहे. सततच्या बॉम्ब हल्ल्यांमुळे 8 लाखांहून अधिक नागरिकांना घर सोडावे लागले असून, मानवी संकट अधिक गंभीर होत आहे.
यानंतर शुक्रवारी उशिरा बुर्ज हम्मूद या बेरूतच्या ईशान्य उपनगरातील निवासी इमारतीवर इस्रायली ड्रोनने हल्ला केल्याचे लेबनॉनच्या राष्ट्रीय वृत्त संस्थेने सांगितले.
हल्ल्यानंतर इस्रायली सैन्याने सांगितले की, बेरूतमध्ये हिजबुल्ला संघटनेच्या एका सदस्याला लक्ष्य करण्यात आले. काही इमारतींच्या तळघरात हिजबुल्लाचा निधी साठवलेला असल्याची माहिती मिळाल्याने कारवाई केल्याचा दावा इस्रायलने केला आहे.
बेरूत आणि दक्षिण लेबनॉनमध्ये इस्रायली हल्ल्यांत किमान 16 जणांचा मृत्यू.
दोन आठवड्यांत लेबनॉनमध्ये 687 मृत्यू, त्यात 98 लहान मुले.
8 लाखांहून अधिक नागरिकांना घर सोडून विस्थापित व्हावे लागले.
इस्रायलचा दावा बेरूतमध्ये हिजबुल्ला सदस्य आणि निधी साठ्यांवर लक्ष्य.
