जीनिव्हा : इराणमध्ये सुरू असलेल्या युद्धात आरोग्य केंद्रे आणि वैद्यकीय कर्मचाऱ्यांना लक्ष्य केले जात असल्याबद्दल जागतिक आरोग्य संघटने(डब्ल्यूएचओ)चे महासंचालक टेड्रोस अधानोम घेब्रेयसस यांनी बुधवारी चिंता व्यक्त केली. तसेच यासंदर्भात गंभीर इशाराही दिला. तेहरानमधील मोतहारी रुग्णालयाजवळ झालेल्या स्फोटांमुळे रुग्णालयाचे नुकसान झाले असून रुग्णांना तिथून हलवावे लागले आहे. तसेच, दोन आपत्कालीन वैद्यकीय केंद्रांचेही नुकसान झाले आहे.
जागतिक आरोग्य संघटनेच्या प्रमुखांनी शनिवारी सुरू झालेल्या अमेरिका-इस्रायली हल्ल्यांमुळे इराणच्या आरोग्य पायाभूत सुविधांवर होणाऱ्या परिणामांबाबत नवीन इशारा दिला आहे. त्यांनी सांगितले की, तेहरानसह इतर दोन शहरांमधील वैद्यकीय सुविधांवर झालेल्या हल्ल्यांमुळे नागरी सुविधांचे मोठे नुकसान होत आहे.
तेहरानमधील रुग्णालयाला फटका
टेड्रोस यांनी सोशल मीडिया प्लॅटफॉर्म एक्सवर माहिती दिली की, 1 मार्च रोजी इराणी राजधानीतील मोतहारी रुग्णालयाजवळ झालेल्या स्फोटांमुळे इमारतीचा काही भाग खराब झाला असून रुग्ण आणि आरोग्य कर्मचाऱ्यांना तिथून सुरक्षित ठिकाणी हलवावे लागले. त्यांनी म्हटले की, ‘संघर्षामुळे आरोग्य सुविधा, कर्मचारी आणि रुग्ण प्रभावित होत आहेत.’
