न्यूयॉर्क; वृत्तसंस्था : न्यूयॉर्कमध्ये संयुक्त राष्ट्र महासभेच्या 80 व्या सत्राच्या निमित्ताने अमेरिकेचे परराष्ट्रमंत्री मार्को रुबियो यांनी भारताचे परराष्ट्रमंत्री एस. जयशंकर यांची भेट घेतली. गेल्या काही महिन्यांपासून अमेरिका आणि भारतामध्ये व्यापार शुल्क आणि एच-1बी व्हिसाच्या मुद्द्यांवरून तणाव असतानाही ही भेट दोन्ही देशांसाठी महत्त्वपूर्ण मानली जात आहे. रुबियो यांनी भारतासोबतच्या संबंधांना ‘महत्त्वाचे’ असल्याचे सांगितले आणि व्यापार, संरक्षण, ऊर्जा, औषधनिर्माण आणि महत्त्वपूर्ण खनिजांसारख्या क्षेत्रांतील भारताच्या सहभागाचे कौतुक केले.
मागील काही महिन्यांत अमेरिकेच्या डोनाल्ड ट्रम्प प्रशासनाने भारतावर रशियन तेलाच्या खरेदीवरून 25 टक्के अतिरिक्त शुल्क लादले. यामुळे भारतावरील एकूण शुल्क 50 टक्क्यांपर्यंत पोहोचले आहे. याव्यतिरिक्त, ट्रम्प यांनी नुकतीच नवीन एच-1 बी व्हिसावर तब्बल 1 लाख डॉलर (सुमारे 88 लाख रुपये) शुल्क आकारण्याची घोषणा केली आहे.
या तणावाच्या पार्श्वभूमीवर झालेल्या जयशंकर आणि रुबियो यांच्या बैठकीत अनेक मुद्द्यांवर सकारात्मक चर्चा झाली. दोन्ही नेत्यांनी इंडो-पॅसिफिक क्षेत्रात शांतता आणि स्थिरता राखण्यासाठी ’क्वाड’ सारख्या माध्यमातून एकत्र काम करण्याचे आश्वासन दिले. जयशंकर यांनी आपल्या ‘एक्स’ पोस्टमध्ये म्हटले आहे की, रुबियो यांच्यासोबतची चर्चा ‘द्विपक्षीय आणि आंतरराष्ट्रीय चिंतेच्या अनेक मुद्द्यांवर’ झाली. ते पुढे म्हणाले की, प्राधान्य क्षेत्रांमध्ये प्रगती करण्यासाठी सातत्यपूर्ण संवादाचे महत्त्व मान्य करण्यात आले.
