पुढारी ऑनलाईन डेस्क : इस्रायलमधील तेल अवीवमध्ये साखळी बॉम्बस्फोट झाल्याची माहिती समोर आली आहे. तेल अवीवमध्ये एकापाठोपाठ सलग तीन बसमध्ये बॉम्बस्फोट झाले. अधिकाऱ्यांना हा दहशतवादी हल्ला असल्याचा संशय आहे. अद्याप या घटनेमध्ये कोणीही जखमी झाल्याचे वृत्त नाही. युद्धबंदी कराराचा भाग म्हणून हमासने गाझामधून चार बंधकांचे मृतदेह परत केल्यानंतर इस्रायल आधीच नाराज असताना हा स्फोट झाला. बसमधील स्फोट हे २००० च्या दशकातील पॅलेस्टिनी उठावादरम्यान झालेल्या बॉम्बस्फोटांची आठवण करून देतात, परंतु असे हल्ले आता दुर्मिळ आहेत.
इस्त्रायलचे पोलिस प्रवक्ते एएसआय अहरोनी म्हणाले की, इतर दोन बसमध्ये स्फोटके सापडली पण त्यांचा स्फोट झाला नाही. इस्रायली पोलिसांनी सांगितले की, पाचही बॉम्ब एकसारखे होते आणि त्यात टायमर होते. त्यांनी सांगितले की, बॉम्बशोधक पथकाने न फुटलेले बॉम्ब निकामी केले आहेत.
तेल अवीव शहराच्या महापौर ब्रोट म्हणाल्या की, कोणालाही दुखापत झाली नाही हा एक चमत्कारच आहे. बसेस त्यांचा मार्ग पूर्ण केल्यानंतर पार्क करण्यात आल्या होत्या. बस कंपनीच्या प्रमुखांनी सांगितले की त्यांनी ताबडतोब सर्व बस चालकांना थांबून तपासणी करण्याचे आदेश दिले. ओफिर करणी म्हणाले की एकदा ते सुरक्षित असल्याचे आढळून आले की त्यांना त्यांच्या मार्गावर परत पाठवण्यात आले.
इस्रायली पंतप्रधान बेंजामिन नेतान्याहू यांच्या कार्यालयाने सांगितले की, त्यांना त्यांच्या लष्करी सचिवांकडून अपडेट्स मिळत आहेत आणि ते घटनांवर लक्ष ठेवत आहेत. शिन बेट अंतर्गत सुरक्षा एजन्सी तपास करत असल्याचे पोलिसांनी सांगितले. "एकाच संशयिताने अनेक बसेसमध्ये स्फोटके ठेवली होती की अनेक संशयित होते हे आम्हाला निश्चित करावे लागेल," असे पोलिस प्रवक्ते हैम सरग्रोफ म्हणाले. गुरुवारी वापरलेले स्फोटके वेस्ट बँकमध्ये वापरल्या गेलेल्या स्फोटकांशी जुळतात असे पोलिस प्रवक्त्यांनी सांगितले, परंतु त्यांनी तपशीलवार माहिती देण्यास नकार दिला.
