पुढारी ऑनलाईन डेस्क
बंगळूर येथील रामेश्वरम कॅफे बॉम्बस्फोट प्रकरणातील (Bengaluru Rameshwaram Cafe blast) मास्टरमाईंडचा एक व्हिडिओ (video) समोर आला आहे. या व्हिडिओत दहशतवादी फराहतुल्लाह घोरी (Farhatullah Ghori) हा भारतातील स्लीपर सेलला दिल्ली, मुंबईसह देशभरातील रेल्वेवर हल्ले करण्यास सांगत आहे. हा व्हिडिओ समोर आल्यानंतर भारतातील गुप्तचर संस्था हाय अलर्टवर आहेत.
सुत्रांच्या हवाल्याने इंडिया टुडेने दिलेल्या वृत्तात म्हटले आहे की घोरी हा फरारी जिहादी असून सध्या तो पाकिस्तानात आहे. त्याने बंगळूरच्या रामेश्वरम कॅफेमध्ये स्लीपर सेलद्वारे पाकिस्तानच्या इंटर-सर्व्हिसेस इंटेलिजेंस (ISI) च्या पाठिंब्याने स्फोट घडवून आणला होता.
१ मार्च रोजी रामेश्वरम कॅफेतील बॉम्बस्फोटात किमान १० लोक जखमी झाले होते. एनआयएने ३ मार्च रोजी या प्रकरणाचा तपास सुरु केला होता. तर १२ एप्रिल रोजी अदबुल मतीन अहमद ताहा आणि मुसावीर हुसेन शाजीब या दोन प्रमुख आरोपींना अटक केली होती. ताहा हा या प्रकरणाचा मास्टरमाईंड असून शाजिबने रामेश्वरम कॅफेमध्ये आयईडी ठेवल्याचा आरोप आहे. त्यांना कोलकाताजवळील एका लॉजमधून अटक करण्यात आली होती. हे दोघे कर्नाटकातील शिवमोग्गा येथील इस्लामिक स्टेट (IS) मॉड्यूलचे कथित सदस्य आहेत. याच मॉड्यूलचा सदस्य असलेल्या शारिकने नोव्हेंबर २०२२ मध्ये मंगळूरमध्ये स्फोट घडवून आणला होता.
या प्रकरणाचा सुत्रधार असलेला घोरी हा भारतीय तपास एजन्सींच्या रडारवर आहे. त्याच्या ३ मिनिटांच्या व्हिडिओमध्ये भारतातील रेल्वे नेटवर्कमध्ये अडथळा आणून घातपात घडविण्यासाठी तो स्लीपर सेलला कॉल करत असल्याचे दिसते. रेल्वेला रुळावरुन घसरवण्याची तो भाषा करत आहे. यात तो प्रेशर कुकरचा वापर करुन बॉम्बस्फोट करण्याच्या विविध पद्धती समजावून सांगत आहे. भारतातील पेट्रोलियम पाइपलाइन आणि हिंदू नेत्यांना लक्ष्य करण्याच्या योजनांबद्दलही घोरी बोलत आहे. भारत सरकार ईडी, एनआयएमार्फत त्यांच्या मालमत्तांना लक्ष्य करून स्लीपर सेल कमकुवत करत असल्याचे तो म्हणतो. "पण आम्ही परत येऊ आणि सरकारला हादरवून सोडू," अशी धमकी घोरीने व्हिडिओमधून दिली आहे. गुप्तचर यंत्रणांकडून मिळालेल्या माहितीनुसार, तीन आठवड्यांपूर्वीच हा व्हिडिओ टेलिग्रामवर जारी करण्यात आला होता.
फराहतुल्लाह घोरी आणि त्यांचा जावई शाहिद फैसल याने दक्षिण भारतात स्लीपर सेलचे मोठे नेटवर्क तयार केले आहे. फैसल रामेश्वरम कॅफे बॉम्बस्फोटातील दोन्ही आरोपींच्या संपर्कात होता आणि तो या प्रकरणाचा हँडलर होता. फरहातुल्लाह घोरी याला अबू सुफियान, सरदार साहब आणि फारू या नावानेही ओळखले जाते. त्याचा अनेक हाय-प्रोफाइल हल्ल्यांत हात आहे. २००२ मध्ये गुजरातच्या अक्षरधाम मंदिर हल्ल्यात सुमारे ३० लोकांचा मृत्यू झाला होता. तर ८० जण जखमी झाले होते. २००५ मध्ये हैदराबादमधील टास्क फोर्स कार्यालयावर झालेल्या आत्मघातकी हल्ल्यामागेही त्याचा हात होता. घोरी कथितरित्या ऑनलाइन जिहादी भरती करतो. दिल्ली पोलिसांनी गेल्या वर्षी दिल्ली आणि उत्तर प्रदेशमधून अनुक्रमे ३ मोस्ट-वॉन्टेड दहशतवाद्यांना अटक केल्यानंतर ही माहिती दिली होती. घोरी हा दहशतवाद्यांचा हस्तक असल्याचे सांगण्यात आले होते.
