तेहरान; वृत्तसंस्था : अमेरिका आणि इस्रायलने शनिवारी इराणमधील नतांझ अणुऊर्जा केंद्रावर हल्ला केला आहे. इराणच्या अणुऊर्जा संघटनेने याची अधिकृत माहिती दिली असून या घटनेमुळे जागतिक पातळीवर चिंता वाढली आहे. दरम्यान, या हल्ल्यात कोणताही किरणोत्सर्ग झाला नसल्याचे स्पष्ट करण्यात आले. हिंदी महासागरातील दिएगो गार्सिया तळावर झालेल्या हल्ल्याच्या पार्श्वभूमीवर हे हल्ले करण्यात आले.
नतांझ केंद्र पुन्हा लक्ष्यावर
इराणच्या अणुऊर्जा संस्थेने प्रसिद्ध केलेल्या निवेदनात म्हटले आहे की, अमेरिका आणि झायनिस्ट इस्रायलच्या हल्ल्यांमुळे आज सकाळी नतांझ युरेनियम समृद्धीकरण केंद्रावर लक्ष्य साधण्यात आले. हे केंद्र इराणच्या अणुकार्यक्रमातील सर्वात महत्त्वाचे ठिकाण मानले जाते.
यापूर्वीही झाले होते हल्ले
नतांझ केंद्र यापूर्वीही अनेक वेळा लक्ष्य बनले आहे. जून 2025 मध्ये इराण-इस्रायल संघर्षादरम्यान इस्रायलने येथे हवाई हल्ले केले होते. तसेच युद्धाच्या सुरुवातीच्या टप्प्यातही या ठिकाणावरील काही इमारतींना नुकसान झाल्याचे उपग्रह चित्रांमधून दिसून आले होते.
तणाव वाढण्याची शक्यता
या ताज्या हल्ल्यानंतर मध्य पूर्वेतील परिस्थिती आणखी चिघळण्याची शक्यता व्यक्त केली जात आहे. अमेरिका आणि इस्रायलच्या कारवाईला इराण कशा प्रकारे प्रत्युत्तर देणार, याकडे जगाचे लक्ष लागले आहे.
किरणोत्सर्ग नाही
हल्ल्यानंतर परिसरात कोणतीही किरणोत्सर्ग (रेडिएशन) गळती झाल्याची नोंद नसल्याचे इराणी अधिकार्यांनी स्पष्ट केले आहे. त्यामुळे स्थानिक नागरिकांसाठी तत्काळ आरोग्याचा धोका नसल्याचे सांगितले जात आहे.
