पणजी : पुढारी वृत्तसेवा
मुंबई - गोवा राष्ट्रीय महामार्ग ६६ वर पर्वरी येथे नव्याने बांधण्यात आलेल्या उड्डाणपुलाचे उद्घाटन केंद्रीय रस्ते वाहतूक व महामार्ग मंत्री नितीन गडकरी यांच्या हस्ते बुधवार, दि. ९ सप्टेंबर २०२६ रोजी सायंकाळी ६ वाजता होणार आहे. या पार्श्वभूमीवर गोवा वाहतूक पोलिसांनी विशेष वाहतूक व पार्किंग व्यवस्था जाहीर केली आहे.
उद्घाटनाचा कार्यक्रम पणजी-म्हापसा महामार्गावरील उड्डाणपुलावर होणार आहे. कार्यक्रमाला येणाऱ्या व्हीआयपींना हॉटेल निओ मॅजेस्टिकच्या बाजूने प्रवेश दिला जाणार आहे. सर्वसामान्यांना गिरी बाजूच्या प्रवेशद्वारातून प्रवेश करता येणार आहे. व्हीआयपी वाहनांसाठी पणजी-म्हापसा कॅरेजवेच्या डाव्या बाजूस नव्या उड्डाणपुलावर पार्किंगची व्यवस्था करण्यात आली आहे.
इतर व्हीआयपी वाहनांसाठी आझाद भवन व गाडगे महाराज हॉल परिसरात पार्किंगची सुविधा असेल. सर्वसामान्यांच्या वाहनांसाठी उड्डाणपुलाजवळील अमनोरा इमारतीजवळ पार्किंगची व्यवस्था करण्यात आली आहे. कार्यक्रमस्थळापर्यंत ये-जा करण्यासाठी शटल बसची सुविधा उपलब्ध करून देण्यात येणार आहे.
