पणजी : पुढारी वृत्तसेवा
हडफडे येथील 'बर्च बाय रोमिओ लेन' अग्निकांड प्रकरणातील संशयित गौरव लुथरा, सौरभ लुथरा आणि अजय गुप्ता, तसेच महिला सहकारी कर्मचाऱ्यावरील लैंगिक अत्याचार प्रकरणातील आरोपी असलेले तहलकाचे माजी संपादक तरुण तेजपाल हे सोमवारी म्हापसा न्यायालयात शरण आले. न्यायालयाने त्यांची रवानगी कोलवाळ येथील मध्यवर्ती कारागृहात (न्यायालयीन कोठडीत) केली.
सर्वोच्च न्यायालयाने संशयित लुथरा बंधू व अजय गुप्ता, तसेच उच्च न्यायालयाने १० वर्षांची शिक्षा ठोठावलेल्या आरोपी तरुण तेजपाल यांचे आव्हान अर्ज फेटाळताना त्यांना न्यायालयाला शरण जाण्याचे निर्देश दिले होते. त्यानुसार दोन वेगवेगळ्या प्रकरणात या तिघांनी सोमवारी म्हापसा न्यायालयात हजेरी लावली.
लुथरा बंधू व अजय गुप्ता या तिघांना कारागृहातील कोविड काळातील विलगीकरण कक्षात (क्वारंटाईन सेल) तर आरोपी तरुण तेजपाल याला शिक्षा भोगत असलेल्या कैद्यांसोबत ठेवण्यात आले आहे. त्याला अटक झाली तेव्हा तो सुमारे सहा महिने पूर्वी कारागृहात होता. त्यामुळे त्यातील काही कैदी त्याच्या ओळखीचे आहेत.
गौरव बंधू व अजय गुप्ता यांना म्हापसा प्रथमश्रेणी न्यायालयाने दिलेल्या सशर्त जामिनाला, तसेच म्हापसा अतिरिक्त सत्र न्यायालयाने तरुण तेजपाल याला निर्दोषत्व ठरवलेल्या निवाड्याला उच्च न्यायालयात आव्हान दिले होते. उच्च न्यायालयाने गौरव बंधू व अजय गुप्ता यांचा जामीन रद्द करून तसेच तरुण तेजपाल याचे निर्दोषत्व रद्द करून १० वर्षांची शिक्षा ठोठावली होती.
या दोन्ही प्रकरणातील संशयितांना न्यायालयात आत्मसमर्पण करण्यास मुदत दिली होती. त्यांनी सर्वोच्च न्यायालयात धाव घेतली होती. मात्र दिलेल्या निर्णयात हस्तक्षेप करण्यास नकार देऊन त्यावर शिक्कामोर्तब केले होते. लैंगिक अत्याचार प्रकरणातील आरोपी तरुण तेजपाल याने उच्च न्यायालयाने ठोठावलेल्या शिक्षेला आव्हान देण्याबरोबरच न्यायालयात आत्मसमर्पण करण्यास मुदत वाढवून देण्याची विनंती केली होती. मात्र सर्वोच्च न्यायालयाने ती फेटाळली होती. त्याला अगोदर आत्मसमर्पण करण्यास सांगितले. त्यानंतर त्याने आव्हान दिलेल्या शिक्ष्याची याचिका सुनावणी घेतली जाईल, असे स्पष्ट केले होते.
