पणजी : पुढारी वृत्तसेवा
एसटी समाजाला राजकीय आरक्षण नोव्हेंबर अखेरपर्यंत देण्याचे आश्वासन राज्य सरकारने दिले आहे. आरक्षणासाठी आवश्यक कायदेशीर प्रक्रिया सुरू असून त्यासाठी काही कालावधी लागणार आहे. सरकार दिलेले आश्वासन पूर्ण करेल, असा विश्वास आमदार गोविंद गावडे यांनी व्यक्त केला.
आरक्षणासाठी आवश्यक मंजुरी मिळाली असून, पुढील कायदेशीर कार्यवाही सुरू आहे. निवडणुका अद्याप जाहीर झालेल्या नाहीत. नोव्हेंबरपर्यंत आरक्षण लागू झाल्यास त्याची योग्य प्रकारे अंमलबजावणी करता येईल. मात्र, आरक्षणाची प्रक्रिया पूर्ण होण्यापूर्वी निवडणुका जाहीर झाल्यास त्यावेळी पुढील दिशा ठरवली जाईल, असे गावडे यांनी स्पष्ट केले.
दिल्लीतील आंदोलनाबाबत बोलताना गावडे म्हणाले की, संविधानाने प्रत्येक व्यक्तीला आंदोलनाचा अधिकार दिला आहे. आपल्या भावना व्यक्त करण्यासाठी आंदोलन करणाऱ्यांना कोणीही रोकू शकत नाही. दरम्यान, राज्यातील एसटी समाजाला राजकीय आरक्षण मिळावे, यासाठी यापूर्वी आंदोलने करण्यात आली आहेत. सरकारने दिलेले आश्वासन पूर्ण करावे, अशी अपेक्षा समाजाकडून व्यक्त होत आहे.
