पणजी : पुढारी वृत्तसेवा
पणजीपासून सांखळीला पोहोचण्यास जवळच्या अंतरासाठी सोयीचे ठरणार्या जुने गोवे ते खांडोळा या रस्त्यावरील गवंडाळी धावजी रेल्वे फाटकावर उड्डाणपूल बांधला जात आहे. गोव्यात आतापर्यंत न वापरलेले नवे तंत्रज्ञान या पुलासाठी वापरले जात आहे.
सिमेंटऐवजी लोखंडाचे मोठेमोठे बॉक्सेस तयार करून ते बसवण्यात येत आहेत. मात्र, हे काम बरेच संथगतीने सुरू असल्याने वाहनचालक आणि नागरिकांत नाराजी व्यक्त करण्यात येत आहे.
दरम्यान, यापूर्वी ते पावसाळ्यापूर्वी पूर्ण होणार, असे सांगण्यात आले होते. आता पावसाळा सुरू होऊन दोन महिने झाले तरी उड्डाणपुलाचे अद्यापही बरेच काम बाकी आहे. त्यामुळे गणेश चतुर्थीनंतरच या उड्डाणपुलाचे काम पूर्ण होईल, असे सध्या तरी दिसून येते. परिणामी, संथगतीने सुरू असलेल्या या कामाबाबत वाहनचालकांत तीव्र नाराजी व्यक्त करण्यात येत आहे.
कंत्राटदाराने दुचाकी व चारचाकी, लहान वाहनांसाठी येथे चांगले पर्यायी रस्ते उपलब्ध केले आहेत. सिमेंट काँक्रिटचे रस्ते दोन्ही बाजूला बांधण्यात आले असून, मधोमध उड्डाणपुलाचे काम सुरू आहे. सकाळी १० ते सायंकाळी ५ च्या दरम्यान मोठ्या वाहनांना येथून बंदी आहे. तरी काही वाहने ये-जा करताना दिसतात. मात्र दुचाकींना दिवस-रात्र परवानगी असल्यामुळे बाणास्तारीमार्गे जाण्याच्या दुचाकीस्वारांना सोयीचे ठरत आहे.
बऱ्याच दिवसांपासून हे काम सुरू असल्यामुळे वाहनचालकांत तीव्र नाराजी व्यक्त होत आहे. बाणास्तारीमार्गे ये-जा करणे दुचाकीस्वारांना सोयीचे ठरत असले तरी पुलाचे काम लवकर करून सर्वांचाच त्रास थांबवावा, अशी मागणी वाहनचालक करू लागले आहेत.
