पणजी : पुढारी वृत्तसेवा
एका १६ वर्षीय मुलीवर लैंगिक अत्याचार आणि बलात्काराचा प्रयत्न केल्याच्या आरोपाखाली अटक करण्यात आलेल्या ३८ वर्षीय मुलीच्या वडिलांची पणजी येथील विशेष पोक्सो न्यायालयाने निर्दोष मुक्तता केली. मुलीने न्यायालयात खोटी तक्रार दिल्याची कबुली दिल्याने न्यायालयाने हा आदेश दिला.
पीडित मुलीने केलेल्या तक्रारीनुसार पर्वरी पोलिसांनी तिच्या वडिलांविरुद्ध गुन्हा दाखल करून आरोपपत्र न्यायालयात सादर केले होते. सुनावणीदरम्यान अल्पवयीन मुलीने न्यायालयात दिलेल्या साक्षीत, आपण रागाच्या भरात वडिलांविरोधात खोटी तक्रार दाखल केली होती, असे सांगितले. या साक्षीसह उपलब्ध पुराव्यांचा विचार केल्यानंतर न्यायालयाने आरोपीविरुद्धचे आरोप सिद्ध झाले नसल्याचे नमूद केले.
फौजदारी खटल्यात आरोप सिद्ध करण्याची जबाबदारी अभियोक्त्याची असते. मात्र, या प्रकरणात पुराव्यांचा अभाव आणि फिर्यादीच्या साक्षीतील बदल लक्षात घेता आरोपीविरुद्धचा गुन्हा सिद्ध होऊ शकला नाही. त्यामुळे विशेष पोक्सो न्यायालयाने संबंधित व्यक्तीची निर्दोष मुक्तता करण्याचा आदेश दिला.
