पणजी : नौकानयनातील धोक्यामुळे मांडवी नदीत नव्या महाकाय कॅसिनोला प्रवेश करण्याची परवानगी देऊ नये, असे आवाहन आम्ही पणजीकर अगेन्स्ट कॅसिनोज या सामाजिक कार्यकर्त्यांच्या संघटनेने बंदर प्रमुखांना केले.
पणजी येथील आझाद मैदानावर आयोजित पत्रकार परिषदेत, माजी नगरसेविका पॅट्रिशिया पिंटो आणि सबीना मार्टिन्स यांनी सांगितले की, ११२ मीटर लांबीच्या कॅसिनो जहाजाला मांडवी नदीत (पणजी बंदर क्षेत्र) प्रवेश देण्यामध्ये अनियमितता आढळून आली आहे.
माहिती अधिकार कायद्यान्वये (आरटीआय) त्यांना अशी माहिती मिळाली आहे की, कॅसिनो जहाजाला सध्याच्या सुमारे ६० मीटर लांबीच्या जहाजाच्या जागी ११२ मीटर लांबीची बोट आणण्यासाठी मंजुरी देण्यात आली आहे. बोटीला दिलेली मंजुरी बेकायदेशीर आहे आणि ते तत्काळ रद्द/मागे घेतले पाहिजे, अशी त्यांनी मागणी केली. त्यांच्या मते, तांत्रिक समितीने स्पष्टपणे सांगितले होते की, नवीन बोटीचा आकार ११२ मीटर असून तो ९० मीटरच्या अनुज्ञेय मयदिपेक्षा खूप जास्त असल्याने, बोटीचा प्रवेश हा नौकानयनासाठी धोकादायक आहे. ९० मीटर ते १२० मीटरची अनुज्ञेय लांबी गोव्याला लागू नाही, परंतु इतर राज्यांना लागू आहे.
नौकानयनाच्या सुरक्षिततेसाठी, कॅप्टन ऑफ पोर्ट्स विभागाने जहाजांची लांबी ९० मीटरपर्यंत मर्यादित केली होती. तथापि, वळणांवर आणि पुलांजवळ नौकानयनातील धोके टाळण्यासाठी बहुतेक जहाजांनी आपली लांबी ७० मीटरपर्यंत मर्यादित केली आहे, असे त्यांनी सांगितले.
