पणजी : पुढारी वृत्तसेवा
राज्यात एलपीजी गॅसच्या कमतरतेमुळे हॉस्पिटॅलिटी क्षेत्राला मोठा फटका बसत असल्याचा मुद्दा समोर आला आहे. अनेक हॉटेल्स आणि रेस्टॉरंटस्ना स्वयंपाकासाठी आवश्यक गॅसचा पुरवठा नियमितपणे होत नसल्याने व्यवसायावर परिणाम होत असल्याचे सांगितले जात असल्याचे आमदार मायकल लोबो यांनी सांगितले.
आमदार लोबो म्हणाले की, गॅस उपलब्ध नसल्यामुळे अनेक हॉटेल्स आणि भोजनालयांना इंडक्शन स्टोव्हसारख्या पर्यायी साधनांकडे वळावे लागत आहे. मात्र इंडक्शन स्टोव्ह वापरण्यासाठी जास्त वीज क्षमतेची आवश्यकता असल्याने लहान आणि मध्यम दर्जाच्या रेस्टॉरंट्सना अडचणींचा सामना करावा लागत आहे.
लोबो यांनी सांगितले की, जर या समस्येवर तातडीने उपाययोजना करण्यात आली नाही तर रेस्टॉरंट्स आणि हॉटेल्सना पर्यटकांना सेवा देणे कठीण होऊ शकते, ज्याचा परिणाम राज्याच्या पर्यटन उद्योगावर होण्याची शक्यता आहे.
या संदर्भात गोवा ट्रॅव्हल अँड टुरिझम असोसिएशन तसेच लघु आणि मध्यम रेस्टॉरंट असोसिएशनने राज्य सरकारकडे तातडीने हस्तक्षेप करण्याची मागणी केली आहे. संबंधित संघटनांनी या विषयावर मुख्यमंत्री डॉ. प्रमोद सावंत यांना पत्र पाठवून गॅस पुरवठा सुरळीत करण्यासाठी तातडीची कारवाई करण्याचे आवाहन केले आहे, असे ते म्हणाले. क्षेत्रातील हॉस्पिटॅलिटी व्यावसायिकांच्या मते, पर्यटन हंगामाच्या पार्श्वभूमीवर एलपीजीचा नियमित पुरवठा सुनिश्चित करणे अत्यावश्यक असल्याचेही ते म्हणाले.
