पणजी : पुढारी वृत्तसेवाकथित लैंगिक अत्याचार प्रकरणात माजी तहलका संपादक तरुण तेजपाल यांना निर्दोष मुक्त करणाऱ्या खटल्याविरोधात गोवा सरकारने दाखल केलेल्या अर्जावर उच्च न्यायालय गुरुवारी (दि. ६) निकाल देणार आहे.
न्यायमूर्ती नीला गोखले आणि न्यायमूर्ती अमित जामसांडेकर यांच्या खंडपीठाने हा निकाल जाहीर करण्यासाठी प्रकरण सूचीबद्ध केले असून, निकालाच्या वेळी तरुण तेजपाल यांनी न्यायालयात वैयक्तिकरीत्या उपस्थित राहण्याचे निर्देश दिले आहेत.
हे अपील २०२१ मध्ये सत्र न्यायालयाने दिलेल्या त्या निकालाविरोधात आहे, ज्यामध्ये गोव्यात नोव्हेंबर २०१३ मध्ये तहलका आयोजित कार्यक्रमादरम्यान एका कनिष्ठ महिला सहकाऱ्यावर लैंगिक अत्याचार केल्याच्या आरोपांतून तरुण तेजपाल यांची निर्दोष मुक्तता करण्यात आली होती.
गोवा सरकारतर्फे बाजू मांडताना सॉलिसिटर जनरल तुषार मेहता यांनी तर तेजपाल यांच्या वतीने ज्येष्ठ वकील आबाद पोंडा यांनी युक्तिवाद केला होता.
