पणजी : पुढारी वृत्तसेवा
पाटो पणजी हे ठिकाण गोव्यो नरिमन पॉईंट म्हणून संबोधले जाते. अनेक मोठ्या कंपनींची मुख्यालये येथे आहेत. मात्र, येथील गटार व्यवस्था पूर्णपणे कोलमडल्यामुळे रस्त्यावर गुडघाभर पाणी साचत आहे.
संस्कृती भवन समोर एक अवाढव्य अशी खासगी इमारत उभी राहत असून या इमारतीच्या बांधकामामुळे येथील अनेक गटारे बुजल्याचे येथील सुरक्षारक्षकांनी सांगितले. ही गटारे पावसापूर्वी उपसणे गरजेचे होते. तसे न झाल्याने आता पावसात ही गटारे तुंबल्याने रस्त्यावर गुडघाभर पाणी साचत आहे आणि त्यातूनच वाहनचालकांना वाहने पुढे न्यावी लागत आहेत.
चारचाकी आणि मोठ्या वाहनांना जास्त त्रास होत नसला तरी दुचाकी चालकांची बरीच तारांबळ होत असून काहींनी या रस्त्याने न येता पर्यायी रस्त्याने जाणे सुरू केले आहे. कला व संस्कृती खात्याच्या संस्कृती भवनासमोरच हे पाणी साचत असल्यामुळे येथील वाचनालयात कला व संस्कृती खात्याच्या कार्यालयात येणाऱ्या अनेकांना या साचलेल्या पाण्याचा त्रास होत आहे.
