पणजी : सांकवाळ पंचायतीमध्ये रिक्त असलेल्या सरपंच व उपसरपंच पदाच्या निवडणुकीसाठी पंचायत संचालक नोटीस बजावण्यासाठी चालढकलपणा करत असल्याचा आरोप करत सात पंचसदस्यांनी मुंबई उच्च न्यायालयाच्या गोवा खंडपीठात याचिका दाखल करण्यात आली आहे. याचिकादाराच्या वकिलांनी ही बाब लक्षात आणून दिल्यावर सुनावणी ५ मे २०२६ रोजी ठेवली आहे.
पंचायतीच्या अकरा सदस्यांपैकी तुळसीदास नाईक, मारिया आझावेदो, निधी नाईक, रोहिणी तोरस्कर, व्हॅलेंटो रॉड्रिग्स आणि जैसिया कादर या सहा पंचसदस्यांनी सरपंच अनुषा लामानी आणि उपसरपंच डेरिक वालेस यांच्या विरोधात अविश्वास ठराव मांडून तो संमतही झाला होता. पंचायतीचे कामकाज आणि निर्णय घेण्याच्या प्रक्रियेबाबत असलेल्या असंतोषाचे कारण देत हा ठराव मांडण्यात आला होता, त्यामुळे सरपंच व उपसरपंच पद रिक्त झाले आहे.
ही पदे भरण्यासाठी निवडणुकीची नोटीस बजावण्याची मागणी पंचायत संचालकांना करण्यात आली. मात्र, त्यांनी कोणतेही उत्तर दिले नाही. ही पदे रिक्त असल्याने पंचायतीची अनेक कामे अडून राहिली आहेत व लोकांचे विविध कामांच्या परवान्यासाठी केलेले अर्ज पडून आहेत. त्यामुळे ही निवडणूक घेण्याचे निर्देश खंडपीठाने द्यावेत अशी विनंती याचिकेत करण्यात आली आहे.
पंचायत संचालकांनी सांकवाळ पंचायतीवर सरपंच व उपसरपंच पदे भरण्यासाठी लवकर निवडणूक घेण्याऐवजी पंचायतीवर प्रशासकाची नियुक्ती करण्यात आली आहे. हा प्रशासक फक्त दैनंदिन काम पाहत असून त्याला निर्णय घेण्याचा अधिकार नाही. या पंचायतीला पूर्णवेळ सचिवही नाही. कामे खोळंबली असल्याचा दावा करण्यात आला आहे.
