म्हापसा : दिवाळीचा सण कुटुंबीयांसोबत साजरा करण्यासाठी गावी निघालेल्या गरीब कामगारांच्या जिवाशी खेळण्याचा संतापजनक प्रकार म्हापशात उघडकीस आला आहे. अवघी ४८ प्रवाशांची आसनक्षमता असलेल्या खासगी आंतरराज्य बसमधून तब्बल १४० प्रवाशांची वाहतूक केली जात असल्याचे आढळले. प्रवाशांना अक्षरशः मेंढरांसारखे कोंबून नेणाऱ्या या बसला म्हापसा वाहतूक पोलिसांनी बोडगेश्वर मंदिराजवळ अडवून ताब्यात घेतले. मंगळवारी रात्री उशिरा ही कारवाई करण्यात आली.
मध्य प्रदेशातील मालकीची ही खासगी 'सीटर-कम-स्लीपर' बस म्हापशातून मध्य प्रदेशातील इंदूरमार्गे उत्तर प्रदेश आणि तेथून नेपाळच्या सीमेकडे रवाना झाली होती. राज्यातील विविध भागांत काम करणारे नेपाळ आणि उत्तर प्रदेशातील कामगार दिवाळी सणासाठी आपल्या मूळ गावी परतत होते. नेपाळपर्यंत पोहोचण्यासाठी साधारण चार दिवसांचा प्रवास करावा लागतो. एवढ्या लांबच्या प्रवासासाठी बसमध्ये करण्यात आलेली प्रवाशांची अमानुष कोंबाकोंबी पाहता, प्रवाशांच्या सुरक्षिततेपेक्षा अधिकाधिक प्रवासी भरून पैसे कमावण्यालाच प्राधान्य दिले जात असल्याचे स्पष्ट झाले. बसमध्ये दोन जणांसाठी असलेल्या जागेवर सात ते आठ जणांना बसवण्यात आले होते.