पणजी : पुढारी वृत्तसेवा
गोवा फॅब्रिकेटर्स असोसिएशनने राज्यातील विविध भागांमध्ये अवैध फॅब्रिकेशनचे काम करणाऱ्या व्यक्तींवर कारवाई करण्याची मागणी केली आहे. गोवा फॅब्रिकेटर्स असोसिएशनचे अध्यक्ष पंकज अमरुजकर यांनी पत्रकारांना सांगितले की, बेकायदेशीर फॅब्रिकेशनचे काम करणाऱ्या व्यक्तींवर कारवाई करण्याची मागणी करत असोसिएशनने मुख्यमंत्री डॉ. प्रमोद सावंत, स्थानिक पालिका, वीज विभाग, कामगार निरीक्षक कार्यालय आणि इतर संबंधित विभागांना निवेदने सादर केली आहेत.
आमची संघटना नोंदणीकृत असून सर्व सदस्यांकडे वैध परवाने आहेत, असे ते म्हणाले.
अमरुजकर म्हणाले की, संघटनेने मदतनीस म्हणून कामावर घेतलेल्यांपैकी अनेकांनी फॅब्रिकेशनचे काम शिकून घेतले आहे आणि आता ते परवान्याशिवाय तुलनेने कमी दरात स्वतंत्रपणे काम करत आहेत.
ज्यामुळे व्यवसायावर प्रतिकूल परिणाम होत आहे. ते सरकारला कोणताही कर भरत नाहीत, असे ते म्हणाले.
गोवा फॅब्रिकेटर्स असोसिएशनचे सहसचिव यदुनाथ शिरोडकर म्हणाले की, डिचोली, साखळी आणि फोंडा भागातील संबंधित अधिकाऱ्यांना आतापर्यंत निवेदने सादर करण्यात आली आहेत. त्यांनी सांगितले की,
मुख्यमंत्र्यांसोबत झालेल्या बैठकीदरम्यान संघटनेने सदस्यांच्या नोंदणीसाठी रहिवासी प्रमाणपत्र, स्थानिक आधारकार्ड आणि निवडणूक कार्ड विचारात घेण्याची विनंती केली होती. मुख्यमंत्र्यांनी या संदर्भात परिपत्रक जारी करण्याचे आश्वासन दिले आहे, असे शिरोडकर म्हणाले.
