पणजी : पुढारी वृत्तसेवा
करंझाळे-पणजी येथे झालेल्या मारहाण प्रकरणातील न्यायालयीन कोठडीत असलेल्या चार आरोपींनी कोलवाळ मध्यवर्ती कारागृहातील फोटो इन्स्टाग्राम स्टोरीवर पोस्ट केल्याने कारागृहाच्या सुरक्षेवर पुन्हा प्रश्नचिन्ह निर्माण झाले आहे.
शोएब बेग, झाकीउल्ला काझी, रेहान भगवान आणि जेडन सोझा हे सध्या कोलवाळ कारागृहात न्यायालयीन कोठडीत आहेत. या चौघांनी कारागृहातील छायाचित्र इन्स्टाग्राम स्टोरीवर पोस्ट केल्याचे समोर आले आहे. त्यामुळे कारागृहात बंदी असतानाही कैद्यांकडे मोबाईल फोन कसा पोहोचला आणि त्याचा वापर कसा केला जात आहे, असा सवाल उपस्थित झाला आहे.
कारागृहात मोबाईल फोनचा वापर करण्यास बंदी असतानाही अशा प्रकारे सोशल मीडियावर छायाचित्रे पोस्ट झाल्याने सुरक्षा यंत्रणेच्या कार्यक्षमतेबाबत चिंता व्यक्त केली जात आहे. यापूर्वीही कोलवाळ कारागृहातून मोबाईल फोन आणि सोशल मीडियाच्या वापरासंदर्भातील प्रकरणे समोर आली आहेत. कैद्यांकडून सोशल मीडियाचा वापर होत असल्याचे समोर आल्याने कोलवाळ कारागृहातील सुरक्षा व्यवस्थेवर पुन्हा एकदा गंभीर प्रश्न उपस्थित झाले आहेत.
