धोंडेवाडी (ता. कराड) येथे गणेश विसर्जन मिरवणुकीदरम्यान मोठ्या आवाजात गाणी लावण्यावरून वाद झाला. दोन गणेश मंडळांच्या कार्यकर्त्यांमध्ये झालेल्या या वादाचे पर्यावसान हाणामारीत झाले. दि. २४ सप्टेंबर रोजी रात्री मंदिर चौकात ही घटना घडली.
नवरभारत व धनराज गणेश मंडळांच्या मिरवणुका मंदिर चौकात आल्यानंतर मोठ्या आवाजावरून वाद सुरू झाला. त्यात एका मंडळाच्या कार्यकर्त्यांनी मिरवणुकीजवळ फटाक्यांची माळ लावल्याने वाद अधिक चिघळला. पोलिसांनी डीजे व बँड बंद करण्याच्या सूचना देऊनही त्याकडे दुर्लक्ष करण्यात आल्याचे पोलिसांनी सांगितले. या प्रकरणी १६ जणांविरुद्ध कराड तालुका पोलिस ठाण्यात गुन्हा दाखल करण्यात आला आहे.
भारतीय न्याय संहितेच्या कलम २२३ (ब) व १९४ (२) अन्वये कारवाई करण्यात आली. तपासादरम्यान सर्वोच्च न्यायालयाच्या आदेशाचे उल्लंघन झाल्याच्या अनुषंगाने दोन्ही मंडळांचा डीजे, बँड जीप व ट्रॅक्टर-ट्रॉली असा सुमारे १५ लाख रुपयांचा मुद्देमाल पोलिसांनी जप्त केला. विसर्जन मिरवणुकीत हुल्लडबाजी न करता मानवी जीवितास धोका निर्माण होईल असे कृत्य टाळावे आणि न्यायालयाच्या निर्देशांचे तंतोतंत पालन करावे, असे आवाहन पोलिसांनी केले आहे.
