शास्त्रीय दृष्टिकोनातून पाहिले तर, टायपिंग करताना मेंदूला एकाच वेळी दोन्ही हातांच्या दहा बोटांना स्वतंत्र आदेश द्यावे लागतात. 'मसल मेमरी' लगेच तयार होत नाही, तोपर्यंत डोळे आणि हात यांचा समन्वय साधणे कठीण जाते.
MARATHI BHASHA GAURAV DIN SPECIAL
मुंबई : ‘टायपिंग’ हा शब्द उच्चारला तरी आजही अनेकांच्या मनात धडकी भरते. याचे मुख्य कारण म्हणजे, कागदावर पेनने लिहिणे ही एक 'नैसर्गिक' क्रिया आहे. लहानपणापासून ही सवय अंगवळणी पडलेली असते. मात्र, कीबोर्डवर टायपिंग करणे हा मेंदू आणि हातांच्या बोटांमधील एका वेगळ्याच समन्वयाचा खेळ आहे. त्यातच मराठीतील जोडाक्षरे आणि काना-मात्रांचा गुंता यामुळे हे काम अनेकांना आव्हानात्मक वाटते; पण आता घाबरण्याचे कारण नाही; २७ फेब्रुवारी 'जागतिक मराठी दिना'निमित्त आपल्या मातृभाषेत व्यक्त होण्यासाठी तंत्रज्ञानाने 'व्हॉइस टायपिंग'चा सक्षम पर्याय उपलब्ध करून दिला आहे. याविषयी जाणून घेऊया...
शास्त्रीय दृष्टिकोनातून पाहिले तर, टायपिंग करताना मेंदूला एकाच वेळी दोन्ही हातांच्या दहा बोटांना स्वतंत्र आदेश द्यावे लागतात. 'मसल मेमरी' लगेच तयार होत नाही, तोपर्यंत डोळे आणि हात यांचा समन्वय साधणे कठीण जाते. मराठी भाषेची व्याप्ती आणि त्यातील शब्दांची गुंफण यामुळे कीबोर्डवर बोटे फिरवणे ही एक मोठी कसरत ठरते.
इंग्रजीमध्ये आपण एकामागून एक अक्षरे टाइप करतो. पण मराठीत जोडाक्षर लिहिताना मेंदूला एकाच वेळी 'व्यंजन + स्वर + दुसरे व्यंजन' असा विचार करावा लागतो. यामुळे टायपिंगचा वेग मंदावतो. या आव्हानावर मात करण्यासाठी आता 'व्हॉइस टायपिंग' हे वरदान ठरत आहे. गुगल प्ले स्टोअरवर उपलब्ध असलेल्या काही आधुनिक ॲप्समुळे आता आपल्याला कीबोर्डवर बोटे थकवण्याची गरज उरलेली नाही. मराठीत विचार व्यक्त करण्यासाठी व्हॉइस टायपिंग हा उत्तम पर्याय आहे.
मोबाईलवर मराठी व्हॉइस टायपिंगसाठी Google Play Store वरील सर्वात विश्वासार्ह आणि लोकप्रिय ॲप्स खालीलप्रमाणे :
१. Gboard (गूगल कीबोर्ड) - हे गूगलचे अधिकृत ॲप आहे आणि बहुतांश अँड्रॉइड फोन्समध्ये ते आधीपासूनच असते. याची अचूकता लक्षणीय आहे. तुम्ही बोलताच वेगाने मराठी शब्द उमटतात. विरामचिन्हे आणि व्याकरण शुद्धता यात उत्तम मिळते.
२. Desh Marathi Keyboard : जर तुम्हाला चॅटिंग करायला आवडत असेल, तर हे ॲप खूप लोकप्रिय आहे. यामध्ये व्हॉइस टायपिंगसोबतच मराठी स्टिकर्स आणि इमोजींचा मोठा संग्रह आहे.
३. Bharat Marathi Keyboard : हे एक भारतीय ॲप असून वापरण्यास अतिशय सोपे आहे. ग्रामीण किंवा बोलीभाषेतील शब्दही हे ॲप चांगल्या प्रकारे ओळखते.
१. तुमच्या फोनमधील 'Google Play Store' वर जा.
२. वरील सर्च बारमध्ये "Gboard" किंवा "Desh Marathi Keyboard" असे टाईप करा.
३.ॲप निवडून 'Install' बटणावर क्लिक करा.
४. भाषा निवडा (Gboard साठी): ॲप उघडून 'Settings' मध्ये जा.
'Languages' मध्ये जाऊन 'Add Keyboard' वर क्लिक करा आणि 'Marathi' निवडा.
त्यानंतर 'Voice Typing' विभागात जाऊन मराठी भाषा 'Enable' करा.
कोणतेही मेसेजिंग ॲप (उदा. WhatsApp) उघडा.
कीबोर्ड उघडल्यावर उजव्या कोपऱ्यात एक छोटा माईक (Microphone) दिसेल.
त्या माईकवर क्लिक करा आणि स्पष्ट आवाजात मराठीत बोला. तुम्ही जे बोलाल, ते आपोआप मराठीत टाईप होईल.
Type in Marathi टाईप इन मराठी, Marathi keyboard, Marathi Voice Typing keyboard, Marathi voice typing अशी अनेक ॲप्लिकेशन्स तुम्हाला गुगल प्ले स्टोअरवर उपलब्ध आहेत. व्हॉट्सॲप वापरताना देखील तुम्हाला व्हॉइस टायपिंगचे टूल उपयुक्त ठरते, ज्यावर तुम्ही क्लिक करून सहजरित्या हवा तो मेसेज टाईप करू शकता. तर आता मराठी टायपिंगची भीती सोडा, “‘माझा मराठाचि बोलु कवतिकें, परि अमृतातेही पैजा जिंके’ या ज्ञानेश्वर माउलींच्या उक्तीला सार्थ ठरवत, आधुनिक तंत्रज्ञानाच्या युगात आपल्या मराठीचा अभिमानाने वापर करूया!”
