मखमलाबाद : लक्ष्मीपूजनाच्या दिवशी पेठ रोडवरील अश्वमेधनगरमध्ये सोमवार (दि.4) रात्री 10.30 ते 11 च्या दरम्यान काही गुंडांनी दांडके व कोयते हातात घेऊन दहशत निर्माण केली. त्यात तीन ते चार दुचाकी, तीन अवजड वाहने तसेच कारच्या काचा फोडून नुकसान केले.
म्हसरूळ पोलिस ठाण्याचे वरिष्ठ पोलिस निरीक्षक अतुल डहाके तसेच गुन्हे शाखेचे पोलिस उपनिरीक्षक मनोहर क्षीरसागर यांनी तत्काळ घटनास्थळी धाव घेत चौकशी केली. काही तासांतच काही संशयित गुन्हेगारांच्या मुसक्या आवळण्यात आला. त्यात चेतन भिकाजी गायकवाड (१९), विकी राजू कुऱ्हाडे (२१), सनी राजू कुऱ्हाडे (२४) तसेच दोन अल्पवयीन गुन्हेगारांना पोलिसांना अटक केली. गुन्हे शाखेचे पोलिस निरीक्षक दीपक पटारे, हवालदार सतीश वसावे, के. एम. खराटे, प्रशांत देवरे, ज्ञानेश्वर कातकाडे, पंकज चव्हाण, प्रशांत वालझाडे यांनी गुन्हेगारांना शोधण्यासाठी विशेष प्रयत्न केले.
